Áskeri bólimsheler men Ulttyq ulan qurylymdarynyń kezekshiligin birneshe aiǵa qaldyrý, tipti kúsheitý qajet bolýy múmkin. Bul týraly Parlament Senatynyń tóraǵasy Dariǵa Nazarbaeva málim etti, dep habarlaidy QazAqparat.
«Memleket qazirgi qiyn kezeńde aýqymdy jumystar atqardy. Barshamyzǵa belgili shyǵyndarǵa qaramastan, óte kóp adamǵa naqty kómek kórsetildi. Biz Úkimettiń, Tótenshe jaǵdai rejimin qamtamasyz etý jónindegi memlekettik komissiianyń, jergilikti jerlerdegi atqarýshy organdardyń qabyldap jatqan sharalaryn qoldaimyz. Sonymen qatar, túrli sebepterge bailanysty nazardan tys qalýy múmkin, biraq mańyzdy birqatar problemalarǵa nazar aýdarý qajet dep esepteimiz», - dedi D. Nazarbaeva Senattyń jalpy otyrysynda.
Osy oraida ol depýtattar nazaryn qarttar men balalar úileri, internattar máselesine aýdardy.
«Depýtattarǵa, jeke maǵan da azamattar men osy meditsinalyq-áleýmettik mekemelerdiń ókilderinen qorǵaný jáne sanitariialyq gigiena quraldarynyń tapshylyǵy týraly ótinishter únemi kelip túsýde. Halyqaralyq jáne otandyq tájiribe kórsetkendei, olar – qoǵamnyń eń osal bóligi. Ol adamdar múldem umyt qalǵandai áserde qalasyń. Bul másele sheshimin tabý qajet», - dedi Senat tóraǵasy.
Sonymen qatar ol jalpy kriminogendik ahýalǵa toqtaldy.
«Bul - qoǵamdy, ásirese iri qalalardyń turǵyndaryn qatty mazalap otyrǵan másele. Qazirden bastap karantin men tótenshe jaǵdaidan keiin qalalarda kriminogendik ahýaldy turaqtandyrý boiynsha jospar ázirleý qajet dep esepteimin. Áskeri bólimsheler men Ulttyq ulan qurylymdarynyń kezekshiligin birneshe aiǵa qaldyrý, tipti kúsheitý qajet bolýy múmkin. Qala turǵyndary bul sharaǵa túsinistikpen qarap, qoldaidy dep senemin. Sonymen qatar, urlyq pen buzaqylyq jasaǵan qylmyskerlerge barynsha qatań jaza qoldana otyryp, ashyi sottar ótkizý kerek», - dedi D. Nazarbaeva.
Munymen qosa ol turmystyq zorlyq-zombylyq jaǵdaiyna pikir bildirdi.
«Qazirgi jaǵdaida kúsheie túsken taǵy bir problema. Áielder men quqyq qorǵaý uiymdarynyń ókilderinen karantin kezinde úidegi turmystyq zorlyq-zombylyqtyń kúrt óskeni týraly aqparat kelip jatyr. Ókinishke qarai, bul karantin sharalarynyń tikelei saldary, zorlyq-zombylyq qurbany bolǵan áiel adam men bala úiinen shyǵyp, qashyp kete almaidy, kómekke de shaqyra almaidy. Jergilikti bilik pen quqyq qorǵaý organdaryna osyndai qylmystardy anyqtaýǵa erekshe nazar aýdarý jáne jalpy áielderdi qoldaý sharalaryn kúsheitý qajet dep esepteimin. Áriptesterim bul problemaǵa túsinistikpen qaraidy dep senemin», - dedi Senat tóraǵasy.
