Parlament Senatynyń tóraǵasy Máýlen Áshimbaev Konstitýtsiiaǵa ózgeris engizý boiynsha referendým týraly pikir bildirdi, dep habarlaidy "Ult aqparat".
«Prezidentimiz Qasym-Jomart Kemeluly Toqaev konstitýtsiialyq ózgerister boiynsha jalpyulttyq referendým ótetin kúndi jariialady. Referendým 5 maýsymǵa belgilendi.
Elimiz túbegeili ózgeristerdiń aldynda tur. Onyń negizgi qozǵaýshy kúshi – osy konstitýtsiialyq reformalar bolmaq. Bul reformalardyń máni – elimizdegi demokratiiany nyǵaitý, azamattardyń memleket isine aralasý múmkindigin arttyrý. Mine, sondyqtan, Prezidentimiz Ata Zańǵa engizilgen ózgeristerdi halyqtyń talqysyna salyp, kópshiliktiń sheshimine súienip qabyldaýdy kózdep otyr», - dep jazdy ol Facebook paraqshasynda.
Áshimbaev konstitýtsiialyq ózgerister aiasynda sýperprezidenttik basqarý modelinen alshaqtaitynymyzdy eske saldy.
«Parlamenttiń jáne jergilikti ókildi organdardyń yqpaly arta túsedi. Quqyq qorǵaý organdaryna qatysty da sheshýshi ózgerister oryn almaq. Mine, munyń barlyǵy azamattardyń múddesiniń, quqyǵynyń laiyqty qorǵalýyna, olardyń úniniń biik minberlerge kedergisiz jetýine kepil bolady.
Prezidentimiz úndeýinde elimizdiń aldynda jańa jáne ádiletti Qazaqstan qurý mindeti turǵanyn taǵy bir márte eske saldy. Jariialanǵan konstitýtsiialyq reformalar osy mindetti tabysty júzege asyrý úshin qajet ekenin jetkizdi jáne azamattardy aldaǵy referendýmǵa belsendi qatysýǵa shaqyrdy.
Referendým – birligimizdi aishyqtaityn aitýly saiasi oqiǵa. Azamattarymyz Memleket basshysy aiqyndaǵan saiasi jańǵyrý bastamalaryn qoldaidy dep senemiz.
Elimiz aman, jurtymyz tynysh, birligimiz bekem bolsyn! Jańa Qazaqstandy qurýǵa birge atsalysaiyq», - dep jazdy Senat spikeri.
