QR Parlamenti Senatynyń depýtattaryn sailaýdyń rásimderi zańnama normalaryna sai ótti. Bul týraly QR Ortalyq sailaý komissiiasynyń tóraǵasy Berik Imashev aitty, dep habarlaidy QazAqparat.
«Sailaý týraly» Konstitýtsiialyq Zańynyń buzylýy týraly aýmaqtyq sailaý komissiialarynan usynystary nemese tańdaýshylardyń aryzdary kelip túsken joq. Daýys berý men basqa da sailaý rásimderi sailaý zańnamasynyń normalaryna sai ótti», - dedi B. Imashev QR Ortalyq sailaý komissiiasynyń otyrysynda.
Bul sailaý naýqanynyń ereksheligine toqtalǵan ol, áielderdiń saiasi belsendiligi artyp kele jatqanyn atap ótti. Iaǵni, sailanǵan 17 depýtattyń 5-i áielder, bul kórsetkish 29,4 paiyzdy qurady. 2014 jáne 2017 jyldardaǵy sailaýda bul kórsetkish tek 6 paiyz bolǵan.
OSK tóraǵasynyń aitýynsha, sailaý kúni Ortsailaýkomnyń internet-resýrsy arqyly tańdaýshylardy tirkeýdi jáne daýys berýdiń aldyn ala qorytyndylaryn shyǵarýdy onlain baiqaý servisteri jumys istedi. Osylaisha, sailaý protsesiniń ashyqtyǵy men jariialylyǵy qamtamasyz etildi. Bul protsess QR OSK aqparattyq arnalary arqyly jedel túrde jariia etildi.
Daýys berý rásimin jáne sailaý qorytyndylaryn shyǵarýdy 242 jergilikti jáne 5 halyqaralyq baiqaýshy baiqap otyrdy. Sailaý óńirlerdegi sanitarlyq-epidemiologiialyq jaǵdaidy eskere otyryp, sailaý protsesiniń sanitarlyq qaýipsizdigin qamtamasyz etý jónindegi barlyq qajetti sharalardy saqtai otyryp ótkizildi.
