Parlament Senatynyń jalpy otyrysynda «Qazaqstan Respýblikasyndaǵy sailaý týraly» Konstitýtsiialyq zańyna tolyqtyrýlar engizý týraly» Konstitýtsiialyq zańy men «Saiasi partiialar týraly» zańyna ózgeris pen tolyqtyrýlar engizý týraly» Zańy qabyldandy, dep habarlaidy "Ult aqparat".
Usynylyp otyrǵan zań jobalar Prezidenttiń Ulttyq qoǵamdyq senim keńesiniń ekinshi otyrysynda bergen tapsyrmalaryn iske asyrý maqsatynda ázirlendi.
«Zań jobalarmen partiialyq sailaý tizimderinde áielder men jastar úshin keminde otyz paiyz mólsherindegi kvotany engizý jáne saiasi partiialardy qurý úshin qoldanystaǵy sandyq tirkeý talabyn eki ese tómendetý usynylady. Osy maqsatta, birinshiden, Sailaý týraly konstitýtsiialyq zańda saiasi partiialar tirkeýge usynǵan partiialyq tizimderde áielder men jastarǵa arnalǵan mindetti kvotalardyń bolýy týraly talap qoiylady. Jalpy, búginde álemdegi memleketterdiń basym bóligi áielder men jastardyń sailaý protsesine teń qoljetimdiligine kepildik berý úshin qajetti sharalar qabyldaýda. Sonymen qatar, Memleket basshysy atap ótkendei, biz jastardyń Parlamentke jáne jergilikti ókiletti organdaryna kelýine yqpal etýge tiispiz. Sondyqtan da, bizdiń qoǵam úshin áielder men jastar jaqsy áleýmettik jáne saiasi áleýetke ie», - dedi Ádilet ministriniń mindetin atqarýshy Natalia Pan.
Osyǵan orai, halyqaralyq tájiribe aiasynda usynylyp otyrǵan jańa normalar áielder men jastardy eldiń qoǵamdyq-saiasi protsesterine belsendi tartýǵa múmkindik beretin bolady.
«Ekinshiden, endi saiasi partiiany tirkeý úshin onyń quramynda qyryq myń emes, jiyrma myń múshesi bolsa jetkilikti. Osy baǵyttaǵy túzetýler Saiasi partiialar týraly zańda kózdelip otyr. Bul usynys saiasi partiialardy qurý tártibin jeńildetedi, sondai-aq memlekettik sheshimderdi ázirleý jáne qabyldaý protsesterine oń áserin tigizedi», - dedi N. Pan.
Usynylyp otyrǵan zań jobalar ár túrli alańdarda maqsatty toptarmen qaraldy. Atap aitqanda, zań jobalary Ulttyq qoǵamdyq senim keńesiniń múshelerimen, saiasi partiialardyń ókilderimen jáne jastarmen keńinen talqylandy.
«Jalpy, osy zańnamalyq bastamalar áielder men jastardy qoǵamnyń saiasi ómirine belsene qatysýǵa, sondai-aq kóppartiialyq júieni odan ári qalyptastyrýǵa oń yqpalyn tigizetin bolady», - dedi ol.
