Parlament Senatynyń jalpy otyrysynda «QR Parlamenti jáne onyń depýtattarynyń mártebesi týraly» Konstitýtsiialyq zańyna tolyqtyrýlar engizý týraly» Konstitýtsiialyq zańy, sondai-aq «QR Parlamentiniń komitetteri men komissiialary týraly» Zańyna parlamenttik oppozitsiia máseleleri boiynsha ózgeris pen tolyqtyrýlar engizý týraly» Zańy qabyldandy,– dep habarlaidy "Ult aqparat".
Zań jobasy Qazaqstan Respýblikasy Prezidenti Qasym-Jomart Toqaevtyń byltyr 20 jeltoqsanda Ulttyq qoǵamdyq senim keńesiniń otyrysynda parlamenttik oppozitsiia institýtyn zańnamalyq bekitý týraly tapsyrmasyn oryndaý maqsatynda daiyndaldy.
«Ol úshin «Aq jol» Demokratiialyq partiiasy aldyn ala (2013 jyly) ázirlegen «Parlamenttik oppozitsiia týraly» zań jobasyn Memleket basshysynyń tapsyrmasyna jáne de qoldanystaǵy zańnamalyq talaptarǵa sáikes jańarttyq. Jumys barysynda biz damyǵan memleketterdiń, árine – Eýropa tájiribesin paidalandyq. Eń aldymen – «Quqyq arqyly demokratiiaǵa damý» atty Eýropa komissiiasynyń («Venetsiia komissiiasy» dep atalatyn), «Demokratiialyq parlamentterdegi oppozitsiianyń róli týraly» baiandamasyn qoldandyq», - dep toqtaldy Májilis depýtaty Azat Perýashev.
Onyń sózine qaraǵanda, zań jobasynyń eń alǵashqy novellasy – buǵan deiin otandyq quqyqtyq keńistikte bolmaǵan «oppozitsiia» uǵymyn engizýi men zańdastyrýy.
Mysaly, oppozitsiia úshin birqatar quqyqtyq artyqshylyq qarastyrylǵan: árbir sessiia kezinde parlamenttik tyńdaý men úkimet saǵattaryn (ministrlerdiń esebin tyńdaý) bekitý quqy, úkimettiń zań jobasymen (oppozitsiia kelispeitin) qatar balama (alternativti) zań jobasyn usyný; Parlamenttiń kez-kelgen is-sharasynda, Májilis pen Senattyń birlesken otyrysynda sóz sóileýge kepildik beriledi.
«Baiandamamnyń basynda aitqanymdai, qujatty jańartqanymyzdan keiin, ol taǵy da jergilikti, ulttyq jáne de halyqaralyq deńgeide talqylaýdan ótken. Mysaly, biylǵy qańtar aiynyń basynda depýtattyq saparlar barysynda aimaqtardaǵy sailaýshylardyń, ǵalymdardyń jáne saiasi qoǵam ókilderiniń qatysýymen talqylandy. Zań jobasy jańa parlamenttik dástúrlerdi, bilik pen órkenietti oppozitsiia ózara jańa deńgeiin jáne jańa saiasi mádenietti qalyptastyrýǵa qyzmet etetinine senimdimin. Sizder, Senat depýtattary zań jobasyn qoldasańyzdar, zań 2021 jyldan bastap kúshine enedi», - dedi Azat Perýashev.
Budan buryn habarlanǵandai, atalǵan zań jobalary biyl mamyr aiynda Parlament Májilisinde maquldandy. Ilespe zań jobasyna sáikes, parlamenttik oppozitsiiaǵa óz depýtattarynyń arasynan QR Parlamenti Májilisi turaqty komitetteriniń tóraǵalary laýazymyna kandidatýra usyný quqyǵy beriledi.
Depýtat Azat Perýashevtiń aitýynsha, turaqty komitetterdiń biriniń tóraǵasy parlamenttik oppozitsiia depýtattarynyń arasynan sailanatyny týraly ereje eskerilgen. Bul túzetýlerge sáikes, parlamenttik oppozitsiia Parlament Májilisi turaqty komitetteriniń hatshylary laýazymyna kandidatýra usynýǵa da quqyly bolady. Bul rette, eki turaqty komitettiń hatshylary parlamenttik oppozitsiia usynǵan depýtattar arasynan sailanady.
