Parlament Senatynyń jalpy otyrysynda «EAEO-nyń tehnikalyq reglamentterinde talaptar belgilenbegen ónimniń EAEO sheńberindegi ainalysynyń tártibi jáne mundai ónimniń qaýipsizdigin qamtamasyz etý qaǵidalary týraly kelisimdi ratifikatsiialaý týraly» Zańy qabyldandy, dep habarlaidy QazAqparat.
Qujattyń negizgi maqsaty - EAEO aýmaǵynda ainalystaǵy barlyq ónimderdiń qaýipsizdigin qamtamasyz etý. Bul Eýraziialyq ekonomikalyq odaq týraly sharttyń erejelerinen týyndaidy.
«Búgingi tańda ainalysqa shyǵarylatyn ónimniń 85 paiyzy Eýraziialyq ekonomikalyq odaqtyń biryńǵai tehnikalyq reglamentterimen retteledi. Bul tamaq ónimderinen bastap, balalar indýstriiasynyń taýarlary, jeńil ónerkásip, mashina jasaý jáne basqa da ónimder túrleriniń keń taýar nomenklatýrasyna arnalǵan tehnikalyq reglamentter. Usynylyp otyrǵan zań jobasynda ónimniń qalǵan túrlerin retteý qarastyrylǵan. Birinshiden, bul EAEO-nyń biryńǵai tehnikalyq reglamentteri qabyldanbaǵan nemese kúshine enbegen ónimder. Ekinshiden, EAEO deńgeiinde ónimge qatysty mindetti talaptar belgilenetin ónimniń biryńǵai tizbesine engizilmegen ónimder», - dedi Saýda jáne integratsiia ministri Baqyt Cultanov.
Onyń aitýynsha, ónimniń biryńǵai tizbesi tutyný jáne paidalaný kezinde qaýiptiligi joǵary táýekeldermen sipattalatyn ónim túrlerin qamtidy. Bul tizbe EAEO-ǵa múshe elderdiń jáne halyqaralyq tájiribelerdi eskere otyryp ázirlengen.
«Biz osy Kelisimniń retteý obektisine jatatyn taýarlar nomenklatýrasyna taldaý jasadyq. Negizinen, bul áleýetti qaýip tóndirmeitin ónimder. Búgingi tańda oǵan qoiylatyn talaptar joq. Tizim úlken emes, shamamen 15 pozitsiiadan turady. Mysalǵa aita ketsek, saǵattar, turmystyq shetkalar, jasandy áshekeiler jáne basqalary kiredi. Ónim týraly málimetterdi aqparattyq bazada jinaqtaý kózdeledi. Olar tutynýshylar úshin qoljetimdi bolady. Aqparattyq resýrs naryqtaǵy jaǵdaiǵa monitoring júrgizýge jáne jańa ónim túrleriniń paida bolýyna jedel den qoiýǵa múmkindik beredi. Bul rette Kelisimmen shyǵarylatyn ónimniń qaýipsizdigin biznestiń óz erkimen qamtamasyz etýi úshin ikemdi jaǵdailar belgilenedi.
Qaýipsizdikti qamtamasyz etýdiń jetkilikti sharty jariialanǵan standarttarǵa nemese synaqtardyń nátijelerine sáikestigi bolyp sanalady. Mundai tásil biznes úshin ákimshilik kedergiler týdyrmaitynyn atap ótemiz», - dedi ministr.
Onyń sózine qaraǵanda, Kelisimdi iske asyrý maqsatynda tártipti retteitin ónim ainalysy qaǵidalarynyń jobasy ázirlendi. Osy erejelermen kásipker toltyratyn qujatty jáne joǵaryda aitylǵandai, osy qujat qabyldanatyn ónimder tizimin bekitý qarastyrylǵan. Qazirgi ýaqytta bul qaǵidalar biznes-qaýymdastyqpen jáne «Atameken» Ulttyq palatasymen talqylanýda. Jalpy alǵanda jan-jaqty túsinistik bar.
Búgingi tańda EAEO-ǵa múshe úsh memleket Kelisimdi ratifikatsiialaý boiynsha memleketishilik rásimderdi aiaqtady.
«Qorytyndylai kele, kelisimdi ratifikatsiialaý kelesi máselelerdi sheshýdi qamtamasyz etetinin atap ótkim keledi: memleket úshin - barlyq ónimniń qaýipsiz ainalysyn qamtamasyz etýdiń quqyqtyq sharttaryna qol jetkizedi, biznes úshin - adal kásipkerliktiń kepili bolady, tutynýshy úshin – sapaly ónimdi tańdaýǵa múmkindik beredi», - dedi Baqyt Sultanov.
