Foto: senate.parlam.kz
Búgin Senattyń jalpy otyrysynda «Qazaqstan Respýblikasynyń keibir zańnamalyq aktilerine bilim berý, tálimgerlik jáne balalardyń qaýipsizdigi máseleleri boiynsha ózgerister men tolyqtyrýlar engizý týraly» Zańy maquldandy, dep habarlaidy Kazinform agenttigi.
Zań Parlament depýtattarynyń bastamasymen ázirlendi. Qujatty qabyldaýdaǵy negizgi maqsat – bilim berý salasyndaǵy jáne jetim balalar men ata-anasynyń qamqorlyǵynsyz qalǵan balalardyń quqyqtaryn qorǵaý salasyndaǵy ulttyq zańnamany odan ári jetildirý.
«Zań jetim balalar úshin tálimgerlik institýtyn engizýdi, balalardyń qaýipsizdigin qamtamasyz etýdi jáne bilim berý uiymdarynyń basqarý erkindigin keńeitýdi kózdeidi. Birinshiden, jergilikti ákimdikter bilim berý sapasyn qamtamasyz etý boiynsha tiisti aýmaqtyń bilim berýdi damytý josparynyń jobasyn ázirleý jáne ony máslihattyń bekitýine usynýy eskerilgen. Sondai-aq, jergilikti ákimdikter tiisti aýmaqta bilim berý uiymdaryn materialdyq-tehnikalyq qamtamasyz etý jóninde sharalar qabyldaýyn mindetteitin jáne apattyq jaǵdaiǵa jol bermeýi men seismikalyq ornyqtylyǵyn arttyrý maqsatynda olardyń jai-kúiin baqylaýdy bes jyl saiyn júzege asyrý týraly normalary usynylǵan», - dedi senator Altynbek Nýhuly.
Budan bólek, balalardyń qaýipsizdigi úshin terezelerdi qaýipsizdik qulyptarymen qamtamasyz etý mindeti týraly norma usynylǵan. Sonymen qatar, jańa yqsham aýdandarynda kóppáterli turǵyn úi salý kezinde, qurylys jobalaý qujattarynda áleýmettik mańyzy bar - bilim berý jáne densaýlyq saqtaý obektileriniń mindetti túrde bolýyn eskerý týraly normalar engizilgen. Iaǵni, densaýlyq saqtaý jáne bilim berý obektilerin ornalastyrý esepke alynbasa, onda bul aýmaqta kóppáterli turǵyn úilerdi salýǵa tyiym salynady. Jańa talap úsh aýysymdy mektepter máselesin sheshýge, sapaly bilim berýge jáne turǵyndarǵa meditsinalyq kómekti ońai ári jyldam alýǵa múmkindik beredi.
«Munymen qosa, arnaiy bilim berý uiymdaryndaǵy jetim balalardyń, ata-anasynyń qamqorlyǵynsyz qalǵan balalardyń óz betinshe ómir súrýge daiyndalýyna jeke qoldaý men kómektesýge baǵyttalǵan tálimgerlik qyzmetin engizý qaralyp otyr. Atalǵan normany qabyldaý - balalardy tolyqqandy áleýmettendirýge, psihologiialyq qoldaýǵa jáne áleýmettik qorǵaýǵa yqpal etedi», - dedi depýtat.
Onyń sózine qaraǵanda, oqý protsesinde uialy telefondardy paidalanýǵa shekteý qoiýdy engizý, testileýsiz birinshi synypqa qabyldaý, balabaqshalarǵa oryn berý boiynsha biryńǵai kezektilikti qamtamasyz etý, bilim berý uiymdarynda zorlyq-zombylyqty nasihattaityn, dini sipattaǵy aqparattyń taralýyna jol bermeý jáne sýitsidke shaqyrýdy boldyrmaý sharalaryn qabyldaýdy kózdeitin normalar usynylǵan.
«Qoryta aitqanda, Zań – bilim berý salasyndaǵy qoldanystaǵy zańnamadaǵy quqyqtyq olqylyqtardy joiý maqsatyn kózdeidi jáne elimizdegi bilim berýdiń sapasyn arttyrý men retteýdiń ulttyq júiesiniń tiimdiligin odan ári kúsheitýge baǵyttalǵan», - dedi senator.
