QR Parlamenti Senaty 2020 jyldan bastap oblystardy damytý strategiialary boiynsha parlamenttik tyńdaýlar ótkizýdi josparlap otyr.
Bul týraly búgin Qazaqstan máslihattarynyń 25 jyldyǵyna arnalǵan respýblikalyq konferentsiiada QR Parlamenti Senatynyń tóraǵasy Dariǵa Nazarbaeva aitty, dep habarlaidy QazAqparat.
«Senat óziniń konstitýtsiialyq sipatyna sáikes elimizdiń óńirlerimen, oblystyq máslihattarmen tikelei, tyǵyz bailanysta. Prezident Qasym-Jomart Toqaev «Qýatty aimaqtar - qýatty Qazaqstan» - degendi aitty. Bul bizdiń ortaq mindetimiz - turaqty qarym-qatynasty nyǵaitý ekenin bildiredi. Senattyń janynan Jergilikti ókildi organdarmen ózara árekettesý úshin qurylǵan Keńes osy baǵytta jumys isteýi kerek», - dedi Senat tóraǵasy.
Sonymen qatar, Dariǵa Nursultanqyzy kelesi jyldan bastap oblystardy damytý strategiialary boiynsha, Senatta máslihat depýtattary men Úkimet ókilderiniń qatysýymen parlamenttik tyńdaýlar ótkizý tájiribesin engizgeli jatqandyǵyn aitty.
«Sondai-aq, men barlyq áriptesterime Parlament Senatynda biryńǵai veb-portal iske qosylǵany týraly habarlaǵym keledi. Onda Joǵarǵy Palatanyń depýtattary men barlyq deńgeidegi ókildi organdar tirkelgen. Biz bul portaldy onlain rejimdegi qyzmettik bailanys quraly, depýtattar arasyndaǵy turaqty tildesý alańy dep bilemiz. Sizderden syndarly suhbat pen nátijeli aqparat, belsendi qatysýdy kútemiz», - dedi Senat tóraǵasy.
Dariǵa Nazarbaeva sóz sóilep bolǵannan keiin birqatar óńirdiń máslihat depýtattaryna QR Parlamenti Senatynyń Alǵys hattaryn tabys etti.
