Búgin QR Parlamenti Senatynyń jalpy otyrysynda «Qazaqstan Respýblikasynyń keibir zańnamalyq aktilerine normashyǵarmashylyqty jetildirý máselesi boiynsha ózgerister men tolyqtyrýlar engizý týraly» Zań qabyldandy, dep habarlaidy QazAqparat.
Qujat boiynsha negizgi baiandama jasaǵan Ádilet ministri Marat Beketaevtyń aitýynsha, zań jobasy zańdardy ázirleý, olar boiynsha qoǵamdyq talqylaýlar ótkizý jáne zańdardy qabyldaý rásimderin jetildirý maqsatynda ázirlendi.
«Zań jobasynda mynadai negizgi erejeler kózdeledi. Birinshi - «Halyq únine qulaq asatyn memleket» tujyrymdamasyna sáikes keletin zań shyǵarý qyzmetiniń jańa kezeńderin engizý. Atap aitqanda, ázirleýshi organdar retteýshilik saiasattyń konsýltativtik qujatyn ázirleidi. Bul qujatta problemalar men yqtimal sheshimder kórsetiledi. Ol múddeleri qozǵalatyn maqsatty toptarmen talqylanatyn bolady. Talqylaý qorytyndysy boiynsha zań jobasynyń tujyrymdamasy jasalady. Bul naqty usynystary kórsetilgen retteýshi organnyń resmi málimdemesi», - dedi ol.
Ministrdiń atap ótýinshe, ekinshiden zań jobalaryn qoǵamdyq talqylaý tásilderin keńeitý kózdeledi.
Azamattardy jańa retteýge aldyn ala daiyndaý maqsatynda árbir zań jobasy men qabyldanǵan zań aqparattyq túsindirý baǵdarlamasymen súiemeldenetin bolady.
«Úshinshi - zań jobalarynyń ǵylymi quqyqtyq saraptamasynyń sapasyn arttyrý. Bir uiymnyń ǵylymi resýrstarymen shektelmei, osy jumysqa tiisti bilimi bar eldegi barlyq ǵylymi sarapshylardy tartý, bul jumysty úilestirýdi Zańnama jáne quqyqtyq aqparat institýtyna júkteý usynylady. Tórtinshi - azamattar men bizneske qosymsha mindetter júkteitin normalarǵa qatysty «ótpeli kezeń» tájiribesin zańnamalyq deńgeide belgileý. Jańa mindetterdi belgileitin normalar halyq pen biznestiń daiyn bolýyna qarai, qabyldanǵan kúninen bastap 60 kúndik merzimnen erte engizilmeitin bolady», - dedi ol.
Onyń atap ótýinshe, besinshiden qabyldanǵan zańdardyń tiimdiligin baǵalaý júrgiziledi.
«Zańdar qabyldanǵannan keiin, olardyń tiimdiligin baǵalaý mindeti usynylyp otyr. Bul mindet zańdy ázirlegen memlekettik organdarǵa júkteletin bolady. Qabyldanǵan zańnyń tiimdiligin baǵalaý úshin, ázirleýshi organ jańa retteýdiń salystyrmaly nátijeleri kórsetilgen esepti daiyndaidy. Bul esep quqyqtyq monitoring aiasynda qoldanylatyn bolady, sondai-aq, Parlamenttik tyńdaýda nemese Úkimet saǵatynda talqylanýy múmkin»,- dedi Marat Beketaev.
