QR Parlamenti Senatynyń jalpy otyrysynda Qazaqstan Respýblikasynyń keibir zańnamalyq aktilerine mádeniet máseleleri boiynsha ózgerister men tolyqtyrýlar engizý týraly» QR Zańy qabyldandy, dep habarlaidy QazAqparat.
«Qazaqstan Respýblikasynyń keibir zańnamalyq aktilerine mádeniet máseleleri boiynsha ózgerister men tolyqtyrýlar engizý týraly» Qazaqstan Respýblikasy Zań jobasynyń maqsaty qoldanystaǵy zańnamany jetildirý jáne mádeniet salasyn damytý úshin qolaily jaǵdailar jasaý bolyp tabylady. Jobamen qamtylǵan negizgi baǵyttar – kitaphana jáne baspa isi, mádeni-kópshilik is-sharalardy retteý máseleleri jáne shyǵarmashylyq odaqtardy qoldaýǵa qatysty túzetýler bolyp otyr», - dedi zań jobasy boiynsha baiandama jasaǵan QR Mádeniet jáne sport ministri Aqtoty Raiymqulova.
Onyń atap ótýinshe, joba «Ulttyq arhiv qory jáne arhivter týraly», «Mádeniet týraly» jáne «Memlekettik múlik týraly» Qazaqstan Respýblikasynyń zańdaryna túzetýler engizýdi kózdeidi jáne túzetýlerdiń negizgi blogy mádeniet salasyna qatysty.
Qujatqa bailanysty qosymsha baiandama jasaǵan senator Aigúl Qaparovanyń aitýynsha, zań jobasynda elektrondy kitaphana, kontserttik qyzmet, kórkemdik keńester, qoǵamdyq mańyzy bar ádebietterdi satyp alý, memlekettik kitaphanalar men mýzeilerdiń aqyly qyzmetteri týraly ózgerister kózdelgen. Úsh zańǵa «Mádeniet týraly», «Ulttyq arhiv qory jáne arhivter týraly» jáne «Memlekettik múlik týraly» zańdaryna ózgerister engiziledi.
«Zań jobasy Qazaqstan ulttyq elektrondy kitaphanasynyń quqyqtyq negizderin qalyptastyrý tártibin kózdeidi jáne elektrondy kitaphana qoryn keńeitýge múmkindik berip, onyń obektilerin anyqtaidy. Zań jobasynda «Qazaqstandaǵy kitaphanalardyń jiyntyq elektrondy katalogy» jáne «oiyn-saýyq mádeni buqaralyq is shara» týraly jańa uǵym engizildi. Qoǵamdyq mańyzy bar ádebietterdi tańdaý jáne basyp shyǵarý, avtorlyq quqyq tártibi máseleleri rettelip, anyqtalyp otyr. Bul mańyzdy. Óitkeni buǵan deiingi normada avtordan shyǵarmany memlekettik menshikke satyp alýda birqatar kelispeýshilikter oryn alyp, avtorlyq quqyq talaptaryn shekteitin jaǵdailar bolǵan. Endi memlekettiń avtorlardan shyǵarmashylyq ónimderdi belgili bir merzimge ǵana satyp alý normalary qarastyryldy», - dedi ol.
Senatordyń sózine qaraǵanda, zań jobasy murajai-kitaphana, teatr jáne tsirk óneri, mýzykalyq jáne kontserttik is-sharalar boiynsha aimaqtyq kórkemdik keńester qurýdy kózdeidi. Bul kezeginde óńirlerdegi mádeni uiymdardyń qyzmetin úilestirip, onyń birqatar problemalaryn sheshýge atsalysady. Sonymen birge shyǵarmashylyq odaqtardy qarjylandyrýdy retteitin jańa norma engizýdi kózdeidi.
«Shyǵarmashylyq odaqtardy qoldaý elimizdegi áleýmettik saiasatty júzege asyrýdaǵy qatynastardyń jańa modelin qalyptastyrady. shyǵarmashylyq bastamalardy qoldaý qorlaryn qurýǵa múmkindik týady. Zań jobasyndaǵy kontserttik qyzmetti retteý normasy kontserttik qyzmetti júieleý, oryndaýshylardyń deńgeiin jáne repertýardyń sapasyn arttyrý, sondai-aq fonogrammalardy paidalaný jónindegi máseleni retteý maqsatyn kózdeidi. Alaida oiyn-saýyq mádeni-buqaralyq is-sharalardy ótkizý kezinde birqatar mindettemeler engizilgenimen zańnamany buzǵany úshin ákimshilik jaýapkershilik qaralmaǵany týraly másele jumys toby barysynda biraz talqyǵa tústi. Osy oraida Zań jobasyn ázirleýshi ministrlik quqyq qoldaný praktikasynda atalǵan normany buzý boiynsha naqty faktiler júieli túrde anyqtalǵan jaǵdaida, aldaǵy ýaqytta «Ákimshilik quqyq buzýshylyq týraly» Kodekske ákimshilik jaýaptylyqty kózdeitin túzetýler engizý jóninde bastama jasaý máselesin kóteretinin málimdep, komitetke hat joldady. Zań jobasyn qabyldaý mádeniet, onyń ishinde kitaphana jáne baspa isi salasyndaǵy qatynastardy, oiyn-saýyq mádeni-buqaralyq is-sharalardy ótkizýdi uiymdastyrý máselelerin, memlekettik kitaphanalar men mýzeilerdiń aqyly qyzmetteri tártibin sondai-aq shyǵarmashylyq odaqtarmen ózara is-qimyldy tiimdi retteýge múmkindik beredi», - dedi Aigúl Qaparova.
