Senattyń altynshy sessiiadaǵy alǵashqy otyrysy jańa qurammen ótti, dep habarlaidy "Ult aqparat".
Senat Tóraǵasy Máýlen Áshimbaev Parlament palatalarynyń birlesken otyrysynda jariialanǵan Memleket basshysynyń Qazaqstan halqyna Joldaýynda elimizdiń ekonomikalyq jáne áleýmettik damýynyń basym baǵyttary naqty belgilengenin atap ótti.
«Memleket basshysy ekonomika, áleýmettik, saiasi salalarǵa qatysty aldaǵy basymdyqtardy aiqyndap berdi. Prezidentimiz ekonomikalyq ósimdi qalpyna keltirý, halyqtyń ál-aýqatyn arttyrý, quqyq qorǵaý júiesin ári qarai jańǵyrtý, saiasi reformalardy jalǵastyrý máselelerine toqtalyp, Parlament pen Úkimettiń aldyna naqty mindetter qoidy. Joldaýda aitylǵan tapsyrmalardy zańnamalyq turǵydan ýaqtyly ári sapaly qamtamasyz etý – bizdiń negizgi mindetimiz», – dedi Senat Tóraǵasy.
Máýlen Áshimbaev senatorlar óńirlerdegi jaǵdaiǵa monitoring júrgizip, halyqty alańdatqan ózekti máselelerdi sheshýge atsalysqanyna nazar aýdardy.
Jaz boiy elimizdegi jáne álemdegi epidemiologiialyq ahýal kúrdeli bolǵany belgili. Prezidenttiń tapsyrmasy boiynsha qajetti qarajat bólinip, tiisti zańnamalyq aktiler qabyldandy.
«Qazir jaǵdaidyń turaqtalyp kele jatqanyn kórip otyrmyz. Biraq Prezidentimiz aityp ótkendei, sanitarlyq, epidemiologiialyq rejimge, saqtyq sharalaryna basa mán berýimiz kerek. Osy jolda depýtattar Memleket basshysynyń tapsyrmalary aiasynda qajetti zańdar qabyldaý jumysyn jalǵastyratyn bolady», – dedi Máýlen Áshimbaev.
Senat aldaǵy ýaqytta jańa depýtattyq qurammen jumys isteidi. Naqty aitqanda, 2020 jyldyń 12 tamyzynda Senat depýtattarynyń sailaýy ótip, onyń qorytyndysy boiynsha Olga Perepechina, Áli Bektaev, Sergei Ershov jáne Aigúl Qapbarova jańa merzimge qaita sailandy. Sondai-aq, senatorlar qataryna jańadan 13 depýtat qosyldy. Palatanyń búgingi otyrysy kezinde olar ant qabyldady.
Óz kezegende Senat Tóraǵasy jańadan sailanǵan depýtattardyń qyzmetine tabys tilep, kásibi biliktilikteri men mol tájiribelerin zań shyǵarý qyzmetinde keńinen paidalanatynyna jáne Senat jumysyna tyń serpin beretinderine senim bildirdi.
Sonymen qatar otyrys barysynda Senat Tóraǵasynyń orynbasary bolyp Nurlan Ábdirov sailandy. Odan bólek, Joǵarǵy Palata komitetteriniń quramy belgilenip, olardyń tóraǵalary sailandy. Atap aitqanda, Konstitýtsiialyq zańnama, sot júiesi jáne quqyq qorǵaý organdary komitetiniń tóraǵasy bolyp Vladimir Volkov; Qarjy jáne biýdjet komitetiniń tóraǵasy bolyp Olga Perepechina; Halyqaralyq qatynastar, qorǵanys jáne qaýipsizdik komitetiniń tóraǵasy bolyp Muhtar Qul-Muhammed; Ekonomikalyq saiasat, innovatsiialyq damý jáne kásipkerlik komitetiniń tóraǵasy bolyp Dáýren Ádilbekov; Áleýmettik-mádeni damý jáne ǵylym komitetiniń tóraǵasy bolyp Murat Baqtiiaruly; Agrarlyq máseleler, tabiǵatty paidalaný jáne aýyldyq aýmaqtardy damytý komitetiniń tóraǵasy bolyp Áli Bektaev sailandy.
