Parlament Senatynyń jalpy otyrysynda «Qazaqstan Respýblikasynyń kóshi-qon protsesterin retteý máseleleri boiynsha keibir zańnamalyq aktilerine ózgerister men tolyqtyrýlar engizý týraly» Zańy eki oqylymda qaralyp, qabyldandy, dep habarlaidy "Ult aqparat".
Zań jobasy Qazaqstan Respýblikasy kóshi-qon saiasatynyń 2017-2021 jyldarǵa arnalǵan tujyrymdamasyn jáne ony Iske asyrý jónindegi is-sharalar josparyn oryndaý maqsatynda ázirlendi.
Zań jobasyn qabyldaýdyń mindetteri kóshi-qon zańnamasyn kelesi baǵyttar boiynsha jetildirýge negizdelgen: Qazaqstanǵa keletin etnikalyq repatrianttar men qonys aýdarýshylar úshin qolaily jaǵdailar jasaý; el ekonomikasynyń qajettiligin qamtityn jaǵymdy investitsiialyq klimat qurýǵa baǵyttalǵan syrtqy eńbek kóshi-qonynyń tiimdi júiesin jetildirý; ozyq halyqaralyq tájiribeni eskere otyryp, kóshi-qon protsesterin retteý salasyndaǵy normativtik quqyqtyq bazany keńeitý jáne zańsyz kóshi-qonnyń jolyn kesý, aldyn-alý.
«Etnikalyq kóshi-qon salasyna qandai ózgerister engiziledi? Birinshiden, qoldanystaǵy zańnamaǵa sáikes, etnikalyq qazaqtar «oralman» mártebesin alý úshin Qazaqstan Respýblikasynyń táýelsizdik alǵanǵa deiin shet memlekettiń aýmaǵynda turý faktisin rastaý qajet. Is júzinde, 1991 jyldan keiin týǵan etnikalyq qazaqtar mundai qujattardy bere almaidy. Osyǵan bailanysty, «oralman» mártebesin alý úshin buryn Qazaqstan Respýblikasynyń azamattyǵynda bolmaýy negizgi kriteriii retinde engiziledi», - dedi B. Nurymbetov.
Ekinshiden, qandas baýyrlarymyzǵa qolaily jaǵdai jasaý úshin, sondai-aq ótkiziletin qujattardyń tizbesi qaitalanýyna bailanysty, ózi niet bildirgen ótinish berýshiniń turaqty turýǵa ruqsatty jáne Qazaqstan azamattyǵyn alý úshin qujattardy bir mezgilde berý múmkindigi kózdelgen.
«Sonymen qatar, Memleket basshysy Qasym-Jomart Toqaevtyń tapsyrmasyn oryndaý maqsatynda zań jobasynda «oralman» sózin «qandas» sózine aýystyrý bóliginde túzetýler engizildi», - dep naqtylady Birjan Nurymbetov.
Kóshi-qon protsesteriniń quqyqtyq bazasyn keńeitý jáne zańsyz kóshi-qonǵa jol bermeý maqsatynda tiisti qadamdar eskerilgen.
«Birinshiden, sheteldikterge turaqty turýǵa ruqsat berý úshin 4 ailyq eseptik kórsetkish mólsherinde memlekettik baj salyǵyn engizý. Ekinshiden, ulttyq zańnamada readmissiiaǵa arnalǵan quqyqtyq negizderdiń joqtyǵynan ulttyq zańnamaǵa readmissiia týraly halyqaralyq erejelerdi engizý usynylady. Úshinshiden, atqarýshylyq is júrgizý boiynsha bereshegi bar adamdardyń ketýine shekteýler kózdelgen tolyqtyrýlar engizý qarastyrylǵan», - dedi ministr.
Eske sala keteiik, biyl qyrkúiek aiynda Memleket basshysy Qasym-Jomart Toqaev «Oralman» sózinen bas tartyp, «qandas» degenimiz jón bolatynyn aitqan edi.
«Men budan buryn da tarihi otanyna kelgen qazaqtardy «oralman» dep ataýdan bas tartyp, «qandas» degenimiz jón bolady degen edim. Jeti atasyn biletin halyqqa «qandas» degen uǵym jarasady», - dedi Prezident.
