Foto: iStock
Senat depýtattary "Keibir zańnamalyq aktilerge jol qozǵalysyn uiymdastyrý máseleleri boiynsha ózgerister men tolyqtyrýlar engizý týraly" zań jobasyn maquldady. Osyǵan sáikes elektrsamokattardy retteý máselesi sheshiledi, - dep habarlaidy Tengrinews.kz.
Zań jobasyn tanystyrǵan senator Evgenii Bolgert zańnyń negizgi maqsaty qalyptasqan quqyqtyq olqylyqty joiý jáne shaǵyn elektrkólikterdiń, sondai-aq elektrsamokattardyń jumysyn zańnamalyq retteýdi engizý ekenin málimdedi.
Zańnamaǵa "Jol júrisi týraly" jáne "Ruqsattar men habarlamalar týraly" eki zańǵa ózgerister men tolyqtyrýlar engizý usynyldy.
"Jol júrisi týraly" zańda onyń tehnikalyq sipattamalary men paidalaný tártibin quqyqtyq retteý jáne júrgizýshiler úshin tyiym salýlar tizbesin belgilei otyryp, "shaǵyn elektr kólik" uǵymy engizilgen. "Jol júrisi týraly" zańy tujyrymdamamen tolyqtyrylǵan. Maksimal jobalyq jyldamdyǵy saǵatyna 25 shaqyrymnan aspaityn kólik quraly retinde tanylǵan "elektrsamokat" jáne olardyń júrý oryndary belgilendi. Sondai-aq, olardyń júrgizýshilerine tyiymdar belgilendi", - dedi Bolgert.
Onyń aitýynsha, elektrsamokattyń júrgizýshileri velosipedke arnalǵan joldarmen júredi. Olar bolmaǵan jaǵdaida zańmen belgilengen sharttar men tyiym salýlardy eskere otyryp, joldyń oń jaǵymen elektrsamokattardyń júrýine ruqsat etiledi. Ol úshin júrgizýshiniń jasy 18-ge tolǵan bolýy kerek. Onyń basynda qorǵanysh dýlyǵasy jáne jaryq shaǵylystyratyn kiim jáne kez kelgen sanattaǵy kýáligi bolýy kerek.
Jaiaý júrginshiler jolynda elektrosamokattyń jyldamdyǵy saǵatyna 6 kilometrden aspaýy kerek.
"Májilis qabyldaǵan elektrsamokattar men shaǵyn elektr kólikteri júrgizýshileriniń quqyqtary men mindetterin, shekteýler men tyiym salýlardy belgileýge baǵyttalǵan zańdy bekitý olardy paidalaný boiynsha qoǵamdyq qatynastardy quqyqtyq retteýdi qamtamasyz etýge septigin tigizedi dep esepteimiz. Májilis qabyldaǵan jeke kólik quraldaryn paidalaný tártibin quqyqtyq retteý salasyndaǵy alǵashqy qadam. Sonymen qatar, engizilgen zańnamalyq jańalyqtardy tájiribede synaýdy, sondai-aq elektrsamokattar men shaǵyn elektrmobilderdi paidalanýdy retteýdiń halyqaralyq tájiribesin eskere otyryp, aldaǵy ýaqytta olardy zańnamalyq turǵydan sheshýdi talap etetin birqatar máseleler áli de bar", - dedi Evgenii Bolgert.
Osyǵan deiin Májilis depýtattary "Keibir zańnamalyq aktilerge jol qozǵalysyn uiymdastyrý máseleleri boiynsha ózgerister men tolyqtyrýlar engizý týraly" zań jobasyn qabyldaǵan bolatyn. Bul qujat boiynsha elektrsamokat kólik quraly retinde tanylady.
Keiin qazaqstandyq sarapshylar elektrsamokattarǵa qandai erejeler men shekteýler engizý kerek ekenin jáne olarǵa jaiaý júrginshiler jolymen júrýge tyiym salý kerek ekenin aitty.
