Senat tóraǵasynyń orynbasary Nurlan Ábdirov jáne senatorlar - Rysqali Ábdikerov pen Sergei Ershov elimizdegi mańyzdy avtojoldardyń sapasyna qatysty Úkimet basshysynyń atyna depýtattyq saýal joldady, dep habarlaidy "Ult aqparat".
Depýtattar saýalynda jyl saiyn joldardyń jóndelýi men kútimi úshin bólinetin qomaqty qarajat ta sóz boldy.
«Jahandyq básekege qabilettilik indeksiniń nusqasy boiynsha úzdik jáne nashar joldary bar elder reitingisinde 2019 jyly Qazaqstan 100-den 43,2 ball jinap, 141 eldiń ishinde 93-orynǵa ie boldy. Al, máselen, kórshiles elder – Tájikstan bizden joǵary 50-shi orynda, Ázerbaijan – tipti 27-orynda. Bul salanyń júieli problemalarynyń biri – júk kólikterdiń belgilengen bilik (os) júktemeleriniń asyp ketýine bailanysty salynǵan jáne jóndelgen joldardyń merziminen buryn buzylýy bolyp otyr», - dedi Rysqali Ábdikerov.
Resmi statistikanyń derekterine sáikes, tehnikalyq sanattar bólinisinde el joldarynyń 9,3 paiyzy ǵana bilikke (os) 10 tonnadan astam júktemeni qabyldai alady. Naqtylap aitqanda, jalpy paidalanymdaǵy joldyń 90,7 paiyzy qoldanystaǵy júk kólikterdiń eń az júktemesin de qabyldai almaidy jáne qater aimaǵynda tur.
«Sonymen qatar, zańnama talaptaryna sáikes jalpy paidalanymdaǵy avtokólik joldary boiynsha samosvalmen 25 tonnadan astam júk tasymaldaýǵa tyiym salynǵanymen, osy joldarda salmaǵy 30-40 tonna bolatyn júkti kóteretin kólikter qozǵalysy toqtamai tur. Atalyp otyrǵan problemany tolyqtai sheshý Kólikti baqylaý inspektsiiasynyń qolynan ázirshe kelmei otyr. Sol sebepti bul qyzmettiń uiymdastyrylýy men sapasy Úkimet tarapynan qatan qadaǵalaýdy talap etedi dep esepteimiz», - delingen depýtattyq saýalda.
Senatordyń sózine qaraǵanda, Qazaqstannyń avtojoldarynda júretin aýyr salmaqty avtokólikterdiń 10 paiyzy ǵana baqylaý beketinde tekseriledi. Bul avtokólik joldarynyń jyldam buzylýyna óz áserin tigizýde.
Depýtattar kóterilip otyrǵan máseleniń áleýmettik mańyzdylyǵyn eskere otyryp:
- kólikti baqylaý beketterdiń jáne Kólikti baqylaý inspektsiiasynyń jalpy shtat sanyń arttyrýdy;
- salmaǵy 25 tonnadan asatyn iri júkti tasityn samosvaldardy zańnamalyq deńgeide tehnologiialyq kólik sanatyna jatqyzýdy jáne júk tasymaldaý faktisin (tehpasport negizinde, ólsheýsiz) tekserý quqyǵyn politsiiaǵa da berilýin qarastyrýdy;
- jer qoinaýyn paidalaný týraly kelisimshartarda jer qoinaýyn paidalanýshylarǵa avtokólikterdiń artyq tielýine tyiym salatyn talaptardy qarastyrýdy jáne olarǵa jaýapkershilikti qatańdatýdy;
- biýdjettiń barlyq deńgeilerinen qarjylandyrylatyn jobalar boiynsha memlekettik satyp alý jónindegi normativter men konkýrstyq talaptarǵa júk avtokólikterin paidalanýy boiynsha tiisti ózgerister engizýdi;
- kólikti baqylaý inspektorynyń talaptaryn oryndamaǵany úshin jaýapkershilikti qatańdatýdy jáne osy joǵaryda kóterilgen máselelerdi sheshý boiynsha basqa da sharalardy Úkimet tarapynan qarastyrýdy surady.
