Parlament Senatynyń depýtattary bir kúndik jalaqysyn Shyǵys Qazaqstan oblysy aýmaǵynda sý tasqynynan zardap shekkenderge aýdarady, dep habarlaidy "Ult aqparat".
«Shyǵys Qazaqstan oblysynda turǵyndar sý tasqynynan zardap shegýde. Óńirde qardyń az túsýinen topyraq qabaty 1,5-2 metr tereńdikke deiin toń bolyp qatqan. Sonymen qatar onyń kúrt erýi ári tolassyz jaýyn-shashyn saldarynan ózenderde sý deńgeii shamadan tys kóterilýine bailanysty bes qala ( Aiagóz, Óskemen, Ridder, Shemonaiha, Semei) jáne 12 aýdan sý tasqynyna ushyrady. Osyǵan bailanysty birqatar aýdandarda tótenshe jaǵdai jariialandy. Jergilikti atqarýshy organ tabiǵi apatqa bailanysty tiisti sharalar qabyldaýda. Barlyq shyǵysqazaqstandyqtar jumylyp, tilsiz jaýǵa qarsy belsene kúresip jatyr. Alaida tehnika men adam kúshi barynsha jumyldyrylýyna qaramastan, oryn alyp otyrǵan jaǵdai qosymsha qarjylai qoldaýdy qajet etedi», - dep toqtaldy senator Dúisenǵazy Mýsin Senattyń jalpy otyrysynda.
Osy oraida D. Mýsin bul máselede aýyzbirshilik pen aǵaiynshylyqty, qamqorlyq pen kómek kórsetý qajettigin atap ótti.
«Áriptester, sý tutqynynda qalǵan jáne tabiǵi apat saldarynan úlken qiyndyqtarǵa kez bolǵan Shyǵys Qazaqstan oblysyndaǵy otandastarymyzǵa kómek qolyn sozyp, 1 kúndik jalaqymyzdy aýdarýdy usynamyn. Osylaisha, biz qiyn ýaqytta qolymyz jetpese de, kóńilimiz ben júregimiz osy óńir halqymen birge ekenin kórsetip, usynysymdy qoldaýlaryńyzdy suraimyn», - dedi depýtat.
Óz kezeginde Senat tóraǵasy Qasym-Jomart Toqaev senatordyń bul usynysyna qoldaý bildirdi.
«Qarsylyq bolmaidy ǵoi. Jaqsy usynys. Sheshim qabyldandy dep esepteimiz. Bul bizdiń Shyǵys Qazaqstan oblysyndaǵy sý tasqynynan zardap shekken azamattarǵa kórsetken kómegimiz bolsyn», - dedi Toqaev.
