QR Parlamenti Senatynyń Tóraǵasy Dariǵa Nazarbaeva bastaǵan joǵarǵy palata depýtattary «Astana» halyqaralyq qarjy ortalyǵynda (AHQO) boldy, dep habarlaidy Qazaqstan Respýblikasy Parlamenti Senatynyń Baspasóz qyzmeti.
AHQO basqarýshysy Qairat Kelimbetov senatorlardy ortalyqtyń, onyń organdary men uiymdarynyń qyzmetimen tanystyrdy, sondai-aq álemdik qarjy naryǵynyń barlyq ózekti úrdisteri eskeriletin jańartylǵan damý strategiiasy ázirlenip jatqany týraly habarlady.
«Astana» halyqaralyq qarjy ortalyǵy «100 qadam» Ult josparynyń bes tarmaǵyna sáikes qurylǵan bolatyn. Qazirgi ýaqytta bes tapsyrmanyń bári oryndaldy nemese iske asýdyń qarqyndy satysynda tur.
Basqarýshynyń aitýynsha, AHQO jumysynyń maqsaty Qazaqstan ekonomikasyn nyǵaitýǵa jan-jaqty qoldaý kórsetý bolyp tabylady. Ol úshin Ortalyqqa kapitaldyń jergilikti naryǵyn damytýǵa jáne ony álemdik naryqtarmen yqpaldastyrýǵa, sondai-aq uzaq merzimdi keleshekte Qazaqstannyń investitsiialyq tartymdylyǵyn arttyrýǵa bailanysty aýqymdy mindetterdi oryndaý tapsyryldy.
Senatorlar AHQO soty men Halyqaralyq tórelik ortalyǵynyń, AHQO Qarjy qyzmetterin retteý jónindegi komitetiniń (AFSA), Astana International Exchange (AIX) birjasynyń, Ekspat ortalyǵynyń jáne úzdiksiz kásibi damý biýrosynyń ókilderimen kezdesti.
AHQO sotynyń jáne Halyqaralyq tórelik ortalyǵynyń tirkeýshisi Kristofer Kempbell-Holt Senat depýtattaryna 2019 jyly aqpanda iske qosylǵan jáne daýlardy onlain sheshýge múmkindik beretin eJustice júiesiniń múmkindikterin kórsetti. Ol sondai-aq AHQO soty men Halyqaralyq tórelik ortalyǵynyń bilim berý baǵdarlamasy aiasynda jalpy aǵylshyn quqyǵy negizderine 500-den astam qazaqstandyq oqyǵanyn habarlady.
AIX birjasy memlekettik aktivterdi jekeshelendirý baǵdarlamasyn júzege asyrýda tiimdi alańǵa ainaldy. 2018 jyly «Qazatomónerkásip» UAK» aktsionerlik qoǵamynyń ornalasýy nátijeli boldy dep tanyldy, 2019 jyly AIX-ke qosymsha aktsiialar paketi shyǵaryldy. Qazirgi ýaqytta «Qazaqtelekom», «Eir Astana» jáne «Qazmunaigaz» aktsionerlik qoǵamdarynyń listingi pysyqtalýda.
Senatorlarǵa sondai-aq AHQO-nyń negizgi damý baǵyttary – islam qarjysy, qarjy tehnologiialary, «jasyl» qarjy tanystyryldy.
Senat Tóraǵasy Dariǵa Nazarbaeva AHQO-da bolýdyń nátijesi boiynsha halyqaralyq qarjy ortalyǵynyń syrtqy jáne ishki naryqtaǵy qyzmeti týraly keńinen habardar etý qajettigin atap ótti. Dariǵa Nazarbaeva AHQO qyzmetkerleriniń jumysy tabysty bolýyna tilektestigin jetkize kelip: «Álemdik qarjy muhityndaǵy úlken keme bolýlaryńyzdy qalaimyz», - dedi.
