Parlament Senatynyń jalpy otyrysynda «2004 jylǵy 22 jeltoqsandaǵy QR Úkimeti men RF Úkimeti arasyndaǵy «Baiqońyr» ǵarysh ailaǵynda «Báiterek» ǵarysh zymyran keshenin qurý týraly kelisimge ózgerister men tolyqtyrýlar engizý týraly hattamany ratifikatsiialaý týraly» Zańy qabyldandy, dep habarlaidy QazAqparat agenttigi.
Bul Hattamaǵa 2020 jylǵy 31 qazanda Máskeý qalasynda qol qoiyldy.
«Hattama «Báiterek» Qazaqstan-Resei birlesken kásiporny» aktsionerlik qoǵamyn biýdjettik kreditten bosatý tártibin jáne «Báiterek» ǵarysh zymyran keshenin júkteý kepildikterin qamtamasyz etedi. Hattamada taraptardyń 2023 jyly orta klasty tasymaldaǵysh zymyranmen «Báiterek» ǵarysh zymyran kesheniniń ushý synaqtarynyń bastalýyn qamtamasyz etý boiynsha mindettemeleri kórsetilgen. Hattamadaǵy basty maqsat - «Báiterek» jobasynyń negizgi sharttaryn túzetý jáne ózektendirý. Bul rette Hattama, eń aldymen, qazaqstandyq taraptyń múddesine sai jasalǵanyn aita ketý kerek», - dedi QR Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin.
Onyń aitýynsha, Qazaqstan taraby úshin bul qajetti Hattama, óitkeni, birinshiden, birlesken kásiporynnyń QR Qarjy ministrliginiń aldyndaǵy biýdjettik kredit boiynsha qarjylyq mindettemeleri máselesin zańdy negizde sheshýge múmkindik beredi.
Budan basqa, qujatqa Resei tarapynyń 2036 jylǵa deiin «Soiýz-5» zymyran-tasyǵyshtaryn ushyrý keshenin qamtamasyz etý jónindegi mindettemeleri engizilgen.
«Báiterek» jobasynyń maqsaty — «Baiqońyr» ǵarysh ailaǵynan ǵarysh apparattaryn ekologiialyq taza zymyran tasyǵyshtarmen shyǵarý. Jobada paidalanylatyn perspektivaly «Soiýz-5» zymyran-tasyǵyshy otynnyń ekologiialyq taza komponentinde kerosinmen ushady, sondai-aq qorshaǵan ortaǵa áserdi aldyn ala baǵalaýdyń oń saraptamasyna ie. «Báiterek» ǵarysh zymyran keshenin qurýdy úilestiretin jáne ony odan ári paidalanýǵa jaýap beretin operator – «Báiterek» Qazaqstan-Resei birlesken kásiporny» AQ. «Báiterek» – bul «Baiqońyr» ǵarysh ailaǵyndaǵy Resei tarabymen birlesken negizgi joba. Bul jobada Resei taraby tasymaldaǵysh zymyrandy qurýdy qamtamasyz etedi (916 mln dollar), al Qazaqstan taraby qoldanystaǵy «Zenit-M» ǵaryshtyq zymyran kesheniniń jerústi keshenin jańǵyrtýdy qarjylandyrýdy memlekettik tapsyrma arqyly oryndaýdy qamtamasyz etedi (90,7 mlrd teńge)», - dedi ministr.
Zań jobasy kúshine engende mynadai nátijelerge qol jetkizýge múmkindik beredi:
1. «Báiterek» Qazaqstan-Resei birlesken kásiporny» aktsionerlik qoǵamy biýdjettik kreditti onyń jarǵylyq kapitalyna aiyrbastaý arqyly kredittik mindettemelerden bosatylady jáne «Báiterek» memleketaralyq jobasyn iske asyrýdy jalǵastyrýǵa múmkindik alady. Aiyrbastaý rásiminiń nátijesinde Qazaqstan tarapynyń Birlesken kásiporynǵa qatysý úlesi shamamen 99%-ǵa deiin artady.
2. Hattama «Báiterek» ǵarysh ushyrý kesheninen 10 jyl ishinde Resei tarapynan keminde jylyna 2 ushyrylym qamtamasyz etýge kepildik beredi. Bul bolashaqta keshenge salynǵan memlekettik investitsiiany qaita óndirip alýǵa múmkindik beredi.
«Zań jobasyn qabyldaý respýblikalyq jáne jergilikti biýdjetterden qosymsha shyǵyndy talap etpeidi, sondai-aq onyń teris áleýmettik-ekonomikalyq saldary da joq. Resei taraby osy Kelisimniń kúshine enýi boiynsha memleket ishilik rásimderin oryndady», - dedi Baǵdat Mýsin.
