Parlament senaty beisenbide plenarlyq otyrysynda «Qazaqstannyń keibir zańnamalyq aktilerine aqparat jáne kommýnikatsiialar máseleleri boiynsha ózgerister men tolyqtyrýlar engizý týraly» zań jobasyn maquldady. Zań jobasyn senattyń áleýmettik-mádeni damý jáne ǵylym komiteti 15 jeltoqsanda talqylaǵan.
Komitet taratqan aqparatqa qaraǵanda, zań jobasy BAQ, teleradio habarlaryn taratý, aqparattandyrý jáne bailanys, aqparattyq qaýipsizdik salalaryndaǵy qatynastardy quqyqtyq jaǵynan rettemek.
Buǵan deiin aqparat jáne kommýnikatsiia ministrligi BAQ salasyndaǵy memlekettik saiasat departamentiniń direktory Eldos Náshiráli jobada memlekettik organdardy jýrnalisterdiń material daiyndaý úshin joldaǵan saýalyna jaýap berý merzimi 15 kúnnen 7 kúnge deiin azaitylǵanyn aitqan. Onyń sózinshe, jobada jýrnalisterge azamattardyń jeke basyna qatysty, atap aitqanda qarjylyq jaǵdaiy, esepshoty, bala asyrap alýy siiaqty aqparattardy olardyń ruqsatymen jarialaýdy mindetteitin talaptar qarastyrylǵan.
22 qarashada zań jobasyn májiliste tanystyrǵan aqparat jáne kommýnikatsiia ministri Dáýren Abaev jobada memlekettik organdardyń "qoǵam ómirine asa mańyzdy oqiǵa nemese tótenshe jaǵdailar" kezinde úsh saǵat ishinde resmi aqparat taratýyn mindetteitin talap qoiylǵanyn aitqan.
Ministr bul jobada telearnalarda dini taqyryptaǵy jáne balalarǵa arnalǵan baǵdarlamalar arasynda jarnama berýge tyiym salý jaiy da qarastyrylǵanyn da habarlaǵan. Jobada jeke azamattar nemese zańdy tulǵalar men BAQ arasyndaǵy daýdy taraptardyń sotqa jetkizbei retteýine de, mediator arqyly sheshýine de múmkindik qarastyrylǵan jáne BAQ salasyndaǵy kez-kelgen qoǵamdyq uiymnyń mediator qyzmetin atqarýyna quqyq berilgen.
Zań jobasy endi prezidenttiń qol qoiýyna jiberilmek.
