Parlament Senatynyń jalpy otyrysynda «Qazaqstan Respýblikasyndaǵy sailaý týraly» Qazaqstan Respýblikasynyń Konstitýtsiialyq zańyna ózgerister men tolyqtyrýlar engizý týraly» QR Konstitýtsiialyq Zańy qabyldandy, dep habarlaidy QazAqparat.
«Memleket Basshysynyń ótken jylǵy 1 qyrkúiektegi joldaýynyń tapsyrmasyn iske asyrý barysynda elimizdegi aýdandyq mańyzy bar qalalardyń, aýyldardyń, kentterdiń, aýyldyq okrýgterdiń ákimderin tikelei sailaýyn engizý máseleleri boiynsha zań jobasy ázirlendi. Qazaqstan Respýblikasynyń memlekettik qyzmet týraly zańnamasyna sáikes biliktilik talaptaryna sai kelgen jáne 25 jasqa tolǵan elimizdiń kez kelgen azamaty sailana alady. Saiasi partiialar músheleri jáne sailaýshylardyń jalpy sanynyń keminde 1% -yna qol jinaǵan kandidattar sailaýǵa túse alady. Sailaý 40 kún buryn jariialanady, al sailaýdyń ózi qazirgi ákimniń ókilettik merzimi aiaqtalǵanǵa deiin 10 kún buryn ótedi. Sailaý ótkizilgennen keiin úsh kún ishinde qorytyndy shyǵarylady», - dedi Ulttyq ekonomika ministri Áset Erǵaliev.
Sailaý ótkizilgennen keiin jeti kún ishinde aýmaqtyq sailaý komissiiasy sailanǵan ákimdi tirkeidi, sodan keiin ol óz ókilettigine kirisedi. Sailaý ákimderdiń ókilettik merziminiń aiaqtalýyna qarai jergilikti biýdjet esebinen ótkiziledi.
«Biýdjet zańnamasynyń normalaryn eskere otyryp, 2021-2022 jyldary qarjylandyrý respýblikalyq biýdjetten nysanaly transferttermen, al keiinnen 2023 jyldan bastap jergilikti biýdjet esebinen jalpy sipattaǵy transfert arqyly júzege asyrylatyn bolady. Biyldyń II jartyjyldyǵynda tikelei sailaýdy engizýge – 4,8 mlrd teńge qajet bolady. Qazaqstan Prezidenti Qasym-Jomart Toqaevtyń 2021 jylǵy 15 qańtarda VII shaqyrylymdaǵy Parlamenttiń birinshi sessiiasynyń ashylýynda bergen tapsyrmasyna sáikes, Parlament Májilisi men máslihat sailaýy kezinde saiasi partiialardyń ótý shegi 7%-dan 5%-ǵa deiin tómendeidi, sondai-aq barlyq deńgeidegi sailaý biýlletenderine «barlyǵyna qarsymyn degen» grafa qosylady», - dedi ministr.
«Osy zań jobasy ákimderdi tikelei halyqtyń sailaýyna múmkindik beredi. Aýyl ákiminiń halyqtyń qajettilikteri men problemalaryna den qoiý jedeldigin arttyrýǵa, sondai-aq «halyq únine qulaq asatyn memleket» tujyrymdamasyn tolyq kólemde iske asyrýǵa múmkindik beredi», - dedi Áset Erǵaliev.
Sonymen qatar palatanyń jalpy otyrysynda «Qazaqstan Respýblikasynyń keibir zańnamalyq aktilerine sailaý máseleleri boiynsha ózgerister men tolyqtyrýlar engizý týraly» ilespe Zań da qabyldandy.
