Semei qalasyndaǵy meditsina ýniversitetiniń ǵalymdary oblystaǵy meditsinalyq qoǵamdastyq ókilderimen birlesip juqpaly dertti emdeýdiń jolyn izdegen. Júieli jumystyń nátijesinde olar ádistemelik nusqaýlyq jasap, jaǵdaiy aýyr naýqasty emdep shyǵardy, dep habarlaidy QazAqparat.
Semei meditsina ýniversitetiniń rektory Ersin Júnisovtiń aitýynsha, koronavirýs juqtyrǵan adamdardy emdeý boiynsha nusqaýlyq dúniejúzilik jáne jeke tájiribege negizdelip jasalǵan.
«Bul nusqaýlyqta qaýipti dertpen aýyratyn naýqastardy emdeýge kómektesetin preparattar men tehnologiialardy ret-retimen tizbektep shyqtyq. Biz elimizde birinshi bolyp osyndai ádistemelik nusqaýlyq jasaǵan ekenbiz. Ony qazaq, orys jáne aǵylshyn tilderinde shyǵardyq. Bul nusqaýlyq qazir Qazaqstandaǵy búkil oblys, qalalarǵa taraldy», - deidi ol.
Onyń aitýynsha, ýniversitet zertteý jumystaryn jii júrgizedi. Sońǵy úsh aidyń ishinde ondaǵy ǵalymdar virýspen kúresýdegi álem tájiribesin saraptap shyqqan.
«Ǵalymdarymyz «Koronavirýs infektsiiasy anyqtalǵan naýqastardy emdeý nátijesiniń boljamy men qaýip-qater kartasyn» jasady. Dárigerler ózderine yńǵaily bolý úshin nusqaýlyqtaǵy kez-kelgen bólimdi ashyp emdeý kezinde qandai jaǵdailarǵa tap bolýlary yqtimal, qandai problemalar týyndaýy múmkin jáne olardy qalai boldyrmaýǵa bolatyndyǵyn bile alýlary kerek. Biz Ýhannyń tájiribesin zerdelep, ondaǵy barlyq basylymdardy jáne Ońtústik Koreia men Japoniianyń tájiribeleri jazylǵan jazbalardy aýdaryp shyqtyq», - deidi Ersin Júnisov.
Aita keteiik, osy nusqaýlyqtyń arqasynda Semei qalasynda aýyr jaǵdaida jatqan naýqas emdelip shyqqan. 27 sáýir kúni ol aýrýhanadan shyǵarylmaq.
