Foto: Tengrinews.kz/Álihan Sariev
Semeilik áiel qarjy piramidasyn jarnamalaǵany úshin bes jylǵa bas bostandyǵynan aiyryldy, - dep habarlaidy «Ult aqparat» Polisia.kz saityna silteme jasap.
Semeidiń 57 jastaǵy turǵyny Aqtóbe, Atyraý, Aqtaý, Almaty, Semei, Pavlodar qalalarynda turatyn basqa tulǵalarmen sóz bailasyp, 2016 jyly Aqtóbe turǵyny jasap shyǵarǵan smartfon túrindegi uialy telefon arqyly paidalanylatyn Shyǵys Qazaqstan oblysynyń turǵyndaryna arnalǵan "APPPORT" mobildi qosymshasyn jarnamalap, úgit- nasihat jumystaryn júrgizgen.
"UNNNITY corporation" JShS saityna jeke bas paidasyn kózdei otyryp, qarajat tartý maqsatynda "APPPORT" mobildi qosymshasyn paidalanýshylar kásipkerlerge "APPPORT" portaly arqyly belgili bir merzimge deiin óz qyzmetterin jarnamalaýǵa múmkindigi bolatynyn aityp sendirgen. "UCREDIT" (virtýaldi valiýta) satyp alý kezinde, sondai- aq jańa tulǵalardy tirkegen jaǵdaida belsendi qatysýshylarǵa qosymsha bonýs alýǵa bolatyny týraly jalǵan aqparat taratqan", - delingen habarlamada.
Kóptegen azamattar jarnamaǵa senip, 350 myńnan 2 million teńgege deiingi kólemde qarajattaryn salǵan. Osylaisha 2016-2024 jyldar aralyǵynda áiel óziniń tanystarymen birigip 2 myńǵa jýyq adamdy aldap, olarǵa jalpy somasy 2,5 milliard teńgege jýyq materialdyq shyǵyn keltirgen.
Sot ony qylmystyq quqyq buzýshylyqty jasaǵany úshin kináli dep tanyp, Qazaqstan Respýblikasy Qylmystyq kodeksiniń 217-baby boiynsha qylmystyq is qozǵalyp, 7 jyl merzimge qarjy jáne kommertsiialyq uiymdarda basshylyq qyzmet atqarý quqyǵynan aiyra otyryp, 5 jylǵa bas bostandyǵynan aiyrý jazasyn taǵaiyndady.
"Sottalǵan jazasyn óteý úshin Semei qalasyndaǵy eń tómengi qaýipsizdik mekemesine keldi. Qazir ol karantin bóliminde jatyr. Onymen oqý-túsindirý jumystary júrgizilip jatyr, karantindik bólimnen shyqqannan keiin sot sheshimimen talap-aryzdardy óteý úshin aqy tólenetin jumysqa ornalasady", – deidi mekeme basshysynyń orynbasary Darhan Bigaziev.
