Semei qalasyndaǵy Qazaq innovatsiialyq gýmanitarlyq-zań ýniversitetine Alash kósemi Álihan Bókeihannyń esimi berildi, dep habarlaidy QazAqparat.
El Táýelsizdiginiń 30 jyldyǵy jáne Álihan Bókeihannyń 155 jyldyǵyna orai Qazaq innovatsiialyq gýmanitarlyq-zań ýniversiteti Alash qozǵalysy jetekshisiniń atymen ataldy.
Búgin bilim ordasynyń bas ǵimaratynda Álihan Bókeihan biýstiniń ashylý saltanaty ótti. Biýst avtory – belgili músinshi, L.N.Gýmilev atyndaǵy Eýraziia Ulttyq ýniversitetiniń professory Talǵat Anarbekov. Sondai-aq ýniversitette «Álihan Bókeihan tulǵasy otandyq ǵylym konteksinde: jańa pánaralyq zertteýler men izdenister» atty ǵylymi-praktikalyq konferentsiia uiymdastyryldy.
«Semei qalasynyń bilim júiesinde Álihan Bókeihan esimin jańǵyrtý isi ózekti. Bul turǵyda respýblikalyq joǵary bilim keńistiginde ózindik orny bar – Qazaq innovatsiialyq gýmanitarlyq-zań ýniversitetiniń ataýy «Álihan Bókeihan ýniversiteti» bolyp aýysty. Zamana aǵysynda ult kóshbasshysy bolǵan tulǵa esiminiń ýniversitetimizge berilýiniń tarihi negizi bar. Bul bilim ordasynyń quryltaishylary men stýdentterdiń el men Semei qalasy tarihyna jáne ulttyq múddeni tý etip kótergen Álihan Bókeihan bastaǵan Alash qozǵalysy qairatkerleriniń tarihi qyzmetine kórsetken qurmeti», - dedi ýniversitet rektory Shyryn Qurmanbaeva.
