Semei qalasynda 9 mádeni eskertkish jóndeledi, dep habarlaidy QazAqparat.
Osy jyldyń naýryz aiynda Semeidiń tarihi-mádeni obektilerin saqtaýdyń 2021-2025 jyldarǵa arnalǵan jol kartasy bekitilgen. Soǵan sáikes, 9 tarihi jáne mádeni eskertkishti jóndeý, qalpyna keltirý josparlanyp otyr. Bul týraly baspasóz konferentsiiasy barysynda qalalyq mádeniet jáne tilderdi damytý bóliminiń basshysy Nazerke Aqqojina málimdedi.
«T.Káýkenov meshiti, Metiz-fýrnitýra zaýytynyń ǵimaraty, Nasos stantsiiasy, Órt sóndirý deposy, Sport mektebi, gýbernator úii (qazirgi oblystyq tarihi-ólketaný murajaiy), poshtashy Lipýhin úii (F.Dostoevskii ádebi-memorialdyq úi-murajaiy), Nevzorovtar otbasy mýzeii jáne bir munaraly meshitke qalpyna keltirý jumystaryn júrgizý kózdelgen. Sonymen qatar ShQO ákimdiginiń qaýlysymen Máńgilik el men Shýgaev kósheleriniń qiylysyndaǵy Jeńis saiabaǵynda ornalasqan Álihan Bókeihanovtyń eskertkishi mádeni mura eskertkishter tizimine engizildi», – dedi ol.
Qalanyń taǵy bir mańyzdy nysany - Uranhaev kóshesi, 17 mekenjaiynda ornalasqan 1873 jyly salynǵan burynǵy áielder gimnaziiasynyń ǵimaraty. Búgingi tańda ǵimarattyń menshik iesi - «Semey mall» JShS. Osy jyldyń 25 aqpanynda onda tarihi-mádeni saraptama júrgizý bastamasy kóterilgen.
«Tarihi-mádeni murany qorǵaý jónindegi oblystyq komissiiasynyń sheshimimen atalǵan ǵimaratqa jergilikti mańyzy bar tarih jáne mádeniet eskertkishi mártebesin berý maquldandy. Komissiia sheshimi QR Mádeniet jáne sport ministrligi janyndaǵy arnaiy komissiiaǵa kelisýge jiberildi», - dedi bólim basshysy.
