Semei qalasynda órt shyqqan kópqabatty úiden 40 adam evakýatsiialandy, dep habarlaidy QazAqparat.
ShQO Tótenshe jaǵdailar departamenti baspasóz qyzmetiniń málimetine súiensek, búgin tún ortasynda Semeidegi kópqabatty úide órt shyqty. Qutqarýshylar habar túsken soń 4 minýtta oqiǵa ornyna kelip jetken. Úidiń 4 jáne 9 qabat arasyndaǵy elektr symdary janǵan. Osynyń saldarynan podez ishin kók tútin basty.
«Órt sóndirýshiler barlyq páterlerdiń esigin qaǵyp, turǵyndardy oiatty. Tútinge túnshyqqandar birden taza aýaǵa shyǵaryldy. Úidiń joǵarǵy qabattarynan 17 adam, onyń ishinde 7 bala qutqaryldy. Tómengi qabattardan 40 adam evakýatsiialandy. Azamattar «Vahta» avtokóligine ornalastyryldy», - delingen aqparatta.
Túngi saǵat 2-ge taman qyzyl jalyn tolyqtai aýyzdyqtaldy. Órttiń shyǵýyna – otty abaisyz qoldaný nemese elektr jabdyǵynyń apattyq rejimi sebep bolýy múmkin. Tilsiz jaýdy óshirýge 25 adam men 6 tehnika jumyldyryldy.
