Semei qalasynda kópqabatty úiden órt shyǵyp, turǵyndar evakýatsiialandy, dep habarlaidy QazAqparat.
ShQO Tótenshe jaǵdailar departamenti baspasóz qyzmetiniń málimetine súiensek, Semeidegi Bógembaiuly kóshesinde ornalasqan 9 qabatty turǵyn úiden órt shyqty.
«Oqiǵa ornyna órt sóndirýshiler shuǵyl kelip jetti. Páterdiń kireberisinde dáliz jáne jihaz janyp jatqan. Gaz-tútinnen qorǵaý qyzmeti kók tútinge oranǵan podezden 4 turǵyndy, onyń ishinde 2 balany evakýatsiialady. Qutqarýshylar azamattardy jyly «Vahta» avtokóligine ornalastyrdy», - delingen aqparatta.
Kóp uzamai qyzyl jalyn sóndirildi. Tilsiz jaýdy óshirýge jeke quramnan 21 adam jáne 6 tehnika jumyldyryldy. Qazirgi ýaqytta órttiń shyǵý sebebi anyqtalýda.
