Semei qalasynda tamyz aiynyń sońyna qarai qoqys óńdeitin zaýyt salynady, dep habarlaidy "Ult aqparat".
Ótken jyldyń qarasha aiynda QR Premer-Ministri Asqar Maminniń 2025 jylǵa deiin el aýmaǵynda 6 qoqys óńdeý zaýytyn salý týraly tapsyrmasy aiasynda qazaqstandyq delegatsiia Gretsiiaǵa sapar jasady. Onda «SABO S.A» atty kompaniianyń basqarýshy direktory Dimitris Kiliarispen kelissózder júrgizilgen.
Sapar qorytyndysy boiynsha taraptar Semei, Óskemen jáne Aqtóbe qalalaryndaǵy qoqys óńdeý zaýyttary úshin qatty turmystyq qaldyqtardy suryptaý jáne qaita óńdeý boiynsha avtomattandyrylǵan jelilerdi satyp alý týraly kelisimge qol qoidy.
Búgin Semei qalasyna grek delegatsiiasy jumys saparymen kelip, atqarylyp jatqan sharalardyń qarqynymen tanysty.
«Aldaǵy ýaqytta barlyq qaldyqtar suryptalatyn bolady. Qazir buǵan qajetti ǵimarat salynyp jatyr. Jumysty iske qosýdy 29 tamyzǵa josparlap otyrmyz», - dedi «Operator» JShS basqarma tóraǵasy Medet Qumarǵaliev.
Qala boiynsha qabyldaý pýnktterin ornalastyrýǵa jaýapty uiym – «Hazipov» JK. Kásiporyn tamyz aiynda shyny qabyldaityn 10 qabyldaý pýnktin iske qosýy tiis.
Óz kezeginde «SABO S.A» grek kompaniiasynyń direktory Dimitris Kiliaris osy seriktestiktiń mańyzdylyǵyn atap ótti.
«Qoqysty qaita óńdeýge nazar aýdarý óte mańyzdy. Atap aitqanda, bilim berý salasynda ekologiia taqyrybynyń qalys qalmaǵany qýantady. Shynynda da, balalyq shaqtan bastap sanany ózgertip, ekologiialyq mádenietti úiretý kerek», – dedi Dimitris Kiliaris.
Kezdesý sońynda delegatsiia músheleri poligon ornyna baryp, júrgizilip jatqan jumystardy baqylap, aldaǵy josparlardy talqylady.
