Semei qalasynda esirtki saýdasymen ainalysqan er adam ustaldy, dep habarlaidy QazAqparat.
ShQO Politsiia departamenti baspasóz qyzmetiniń málimetine súiensek, Semei qalalyq PB Esirtki qylmysyna qarsy is-qimyl bólimi men UQK Shyǵys Qazaqstan oblystyq departamentni birlesip jedel-izdestirý sharalaryn júrgizdi.
«Sonyń nátijesinde, shahar aýmaǵynda esirtkiniń zańsyz ainalymyna qatysy bar degen kúdikpen Aiagóz qalasynyń 44 jastaǵy turǵyny ustaldy. Páterin tintý kezinde perdeniń artyna jasyrylǵan jasyl tústi sómke tabyldy. Onyń ishinde erekshe iisi bar ósimdik tektes zat salynǵan polietilen paket bolǵan», - delingen aqparatta.
Saraptama qorytyndysyna sáikes, tárkilengen zat keptirilgen marihýana bolyp shyqty. Onyń jalpy salmaǵy shamamen 10 kelini qurady.
Atalǵan fakti boiynsha QR QK-niń 297-baby 3-bóligimen (Esirtkini, psihotroptyq zattardy jáne sol tektesterdi ótkizý maqsatynda zańsyz daiyndaý, qaita óńdeý, satyp alý, saqtaý, tasymaldaý, jóneltý nemese ótkizý) sotqa deiingi tergeý amaldary bastaldy. Er adam 10-nan 15 jylǵa deiingi merzimge bas bostandyǵynan aiyrylýy múmkin.
