Ertis ózeni sýynyń deńgeii tómendedi. Bul týraly búgin QR IIM Tótenshe jaǵdailar komiteti tóraǵasynyń orynbasary Barat Duzaqbaev aitty, dep habarlaidy QazAqparat.
«Ertiste seń júrýine bailanysty ózenniń sý deńgeii kóterildi. Sonyń saldarynan Shyǵys, Beibitshilik eldi mekenderi men Polkovnik aralyndaǵy turǵyn úi alaptaryn sý basý qaýpi týyndaǵan edi. Bólimsheler halyq arasynda túsindirý jumystaryn júrgizdi. Barlyǵyna eskertildi, qaýipsiz jerge kóshýge daiyn», - dedi Barat Duzaqbaev.
Onyń aitýynsha, Polkovnik aralyndaǵy 1 turǵyn úidiń aýlasyna ǵana sý kirgen. Atalǵan úidiń 8 turǵyny, onyń ishinde 3 bala evakýatsiialaý beketine ornalastyryldy. 7 iri qara mal qaýipsiz jerge shyǵaryldy.
Sonymen qatar, ol Semei qalasynda 7 evakýatsiia beketi ázirlengenin aitty.
«Olar: «Semei» qonaq úii men 6 mektep. Adamdardy qaýipsiz jerge kóshiretindei jaǵdai týyndasa sonda ornalastyramyz. Qazirgi ýaqytta Ertistiń sý deńgeii tómendep keledi. Osy ýaqyttaǵy sý deńgeii 445 sm-di quraidy. Al qaterli belgi 450 sm. Ahýal baqylaýda tur», - dedi ol.
Eske sala keteiik, dúisenbi kúni qala ákimi Ermak Sálimov brifing ótkizip, Ertistegi sý deńgeii 478 santimetrge kóterilgenin habarlaǵan bolatyn. Sarapshylar túsindirgendei, sý deńgeiiniń kóterilýine tómengi muzdyń jinalýy sebep bolǵan. Qala basshysy jaǵdaidy baqylaýda ustaitynyn atap ótti. Sondai-aq, tótenshe jaǵdaiǵa bailanysty j edel shtab quryldy.
