Foto: stan.kz
6 qańtarda tańerteń Semei avtobýs parkiniń 50-ge jýyq júrgizýshisi jalaqy azdyǵyn aityp, ereýilge shyqty, dep habarlaidy Azattyq radiosy.
Saǵat 7-niń kezinde Semei qalasynyń aialdamalarynda avtobýs kútkender kúrt kóbeiip, taksi eki ese qymbattaǵan.
Buǵan deiin jalaqynyń azdyǵy men eńbek jaǵdaiynyń talapqa sai emestigine narazy 26 júrgizýshi jumystan bosatý týraly aryz bergen.
"Jalaqymyzdy kóbeitip, eńbek jaǵdaiymyzdy túzesin. Baǵa sharyqtap barady, al jalaqymyz 2019 jyldan beri ósken joq!" deidi ereýildetip turǵan júrgizýshiler.
Olardyń ereýilge shyǵýǵa daiyndalyp jatqany týraly habar áleýmettik jelide jeksenbiniń keshinde taraǵan.
"Semei avtoparkiniń júrgizýshileri tańerteń ereýilge shyqpaqshy. Bizge jetken málimetke qaraǵanda, avtobýstardyń 80 paiyzy jumysqa shyqpaidy. Sondyqtan jol júristerińizdi qazirden josparlap, balalaryńyzdy mektepke jetkizýdiń qamyn jasai berińizder" dep jazdy Telegram-daǵy Semeyonline016 arnasy.
Avtopark iesi Grigorii Pinchýktyń qala ákimimen kezdesip, eki tarap 1 aqpannan bastap júrgizýshilerdiń jalaqysyn 40 paiyz, kondýktorlardyń jalaqysyn 30 paiyz kóbeitýge ýaǵdalasqany habarlandy.
"Keshe qala ákimimen kezdestim, jalaqylaryńyz 1 aqpannan bastap 30-40 paiyz kóbeiedi. Qala turǵyndarynyń júris-turysyn kidirtpeiik, ýádemizde turmasaq, taǵy da jinalarsyzdar" dedi Grigorii Pinchýk.
Pinchýk ereýildi "arandatý" dep atap, qajet bolsa politsiia shaqyrýy múmkin ekenin de aitty. Óitkeni kei júrgizýshiler kúndelikti jumysyna shyǵyp bara jatqan avtobýstardy toqtatqan.
"Olardyń ne talap etip turǵanyn da túsinbeimin, óitkeni naqty eshteńe usynyp jatqan joq, áiteýir, kedergi jasap tur. Eńbek jaǵdaiy unamasa, ózge kásiporyndarǵa baryp, sonda jumys istei berýine bolady. Bular jumys istegisi kelmeidi. Jumysty toqtatqany úshin shara qoldanýǵa májbúrmin" deidi Pinchýk.
Avtobýs júrgizýshileriniń sózinshe, olarǵa jalaqyny qańtar aiynda kóbeitýge ýáde berilgen, alaida ýáde oryndalmaǵan. Qazir júrgizýshilerge saǵatyna myń teńge tóleidi. Al Grigorii Pinchýk jalaqy máselesin qańtar aiynda sýbsidiia qanshalyqty kóbeietini belgili bolǵan soń qarastyrýǵa ýáde bergenin aitty.
Onyń sózinshe, avtoparkke bólingen aqsha qymbat janar-jaǵar maidan "artylmaidy".
Júrgizýshiler eńbek jaǵdaiyna da narazy. Olar segiz saǵat emes, táýligine 12-16 saǵat jumys isteitinin aitady.
"Zańda segiz saǵat eńbek normasy bekitilgen. Al biz 12-16 saǵat jumys isteimiz. Kondýktordyń da mindetin atqaramyz. Kondýktorǵa kúnine 8 myń teńge tóleitin bolsa, dál sol jumysty isteitin bizge saǵatyna 150 teńge ǵana qosymsha aqy tóleidi. Mysaly, 15 kúnge maǵan 3 myń teńge ǵana tóledi. Tym bolmasa kondýktordyń jalaqysynyń jartysyn bermei me? Jolaqysynan jymqyrýymyz kerek pe? Men urlyq jasaǵym kelmeidi" deidi avtobýs júrgizýshisi Viacheslav Goidenko.
Jalaqysy aqpannan bastap kóbeietinine senbei turǵan júrgizýshilerge Grigorii Pinchýk jańa eńbek shartyn kórsetýge ýáde berdi.
Semei qalasynda úsh avtobýs parki bar. 2021 jyly úzdiksiz janjal men ereýilden soń Semey bus avtobýs parki jumysyn toqtatqan.
