Túrkistan oblysynda nóser jaýynnan úii búlingen azamattardyń shyǵyny arnaiy saraptaý komissiiasynyń sheshimimen anyqtalady. Bul týraly búgin aimaq basshysy Ómirzaq Shókeev tótenshe jaǵdai jónindegi shtab otyrysynda málimdedi, - dep habarlaidy "Ult aqparat".
Óńir basshysynyń sózinshe, qazirgi tańda jaramsyz bolǵan úiler men jóndeýdi qajet etetin baspanalardy qaita qalpyna keltirý máseleleri qarastyrylýda.
«Jergilikti deńgeidegi tótenshe jaǵdaidyń saldaryn óz kúshimizben joiamyz. Oǵan tájiribemiz jetkilikti. Sel saldarymen kúreste Maqtaaral tájiribesin paidalanamyz. Sý shaiǵan aýmaqtar sektorǵa bólingen. Olarǵa kómekke kelgen ózge aýdan basshylary jaýapty. El bolyp jumylyp, tótenshe jaǵdaidy eńserýge barlyq múmkinshilik bar», – dedi Ómirzaq Shókeev shtab otyrysynda.
Aita keteiik, keshe keshkisin Túrkistan oblysynyń taýly aýdandarynda nóser jaýyn saldarynan birneshe aýdandy sý shaiǵan bolatyn. Tólebi, Qazyǵurt, Báidibek aýdandarynda jalpy sany 522 úidiń aýlasyn sý shaiyp, 4 úidi sý basqan.
Tótenshe jaǵdai oryn alǵan aýdannan 258 adam evakýtsiialandy. Sý tasqyny zardabyn joiýǵa 612 maman, 84 tehnika jáne 47 motopompa jumyldyryldy.
