Búgin, 18 mamyr kúni saǵat 04-50-de Aqmola oblysy, Býrabai aýdanynyń Shýchinsk qalasynda «Jomart» bazarynyń bir qabatty jeke turǵan ǵimaraty órtendi. Oqiǵa ornyna 97 órt sóndirýshi jiberildi, - dep habarlaidy QazAqparat Aqmola oblystyq Tótenshe jaǵdailar departamentiniń baspasóz qyzmetine silteme jasap.
Jalyn 1700 sharshy metr aýmaqty sharpyǵan. Al ǵimarattyń jalpy aýdany 3000 sharshy metr. 45 minýt ishinde órt sóndirýshiler órtti oqshaýlap, jalynnyń taralýyna jol bermedi. Osylaisha eki saǵat ishinde órtti tolyǵymen sóndirdi.
«Órt sóndirý barysynda er adamnyń denesi tabyldy. Aldyn ala boljam boiynsha ol bazardyń kúzetshisi bolýy múmkin. Qazirgi tańda anyqtaý jumystary júrip jatyr. Órt ornynda órt-tehnikalyq zerthanasynyń ókilderi men politseiler jumys istep jatyr. Órttiń shyǵý sebebi anyqtalý ústinde. Órtti sóndirýge Tótenshe jaǵdailar departamentiniń 97 qyzmetkeri men 25 tehnika, jergilikti atqarýshy organdardyń úsh qyzmetkeri men úsh tehnikasy jumyldyryldy», - delingen habarlamada.
Aqmola oblysynyń Tótenshe jaǵdailar departamenti óńir turǵyndary men qonaqtaryna órt qaýipsizdigi erejelerin saqtaý qajettigin eskertedi. Órt bolǵan jaǵdaida dereý 101 nómirine qońyraý shalyńyz.
