بٷگٸن, 18 مامىر كٷنٸ ساعات 04-50-دە اقمولا وبلىسى, بۋراباي اۋدانىنىڭ ششۋچينسك قالاسىندا «جومارت» بازارىنىڭ بٸر قاباتتى جەكە تۇرعان عيماراتى ٶرتەندٸ. وقيعا ورنىنا 97 ٶرت سٶندٸرۋشٸ جٸبەرٸلدٸ, - دەپ حابارلايدى قازاقپارات اقمولا وبلىستىق تٶتەنشە جاعدايلار دەپارتامەنتٸنٸڭ باسپاسٶز قىزمەتٸنە سٸلتەمە جاساپ.
جالىن 1700 شارشى مەتر اۋماقتى شارپىعان. ال عيماراتتىڭ جالپى اۋدانى 3000 شارشى مەتر. 45 مينۋت ٸشٸندە ٶرت سٶندٸرۋشٸلەر ٶرتتٸ وقشاۋلاپ, جالىننىڭ تارالۋىنا جول بەرمەدٸ. وسىلايشا ەكٸ ساعات ٸشٸندە ٶرتتٸ تولىعىمەن سٶندٸردٸ.
«ٶرت سٶندٸرۋ بارىسىندا ەر ادامنىڭ دەنەسٸ تابىلدى. الدىن الا بولجام بويىنشا ول بازاردىڭ كٷزەتشٸسٸ بولۋى مٷمكٸن. قازٸرگٸ تاڭدا انىقتاۋ جۇمىستارى جٷرٸپ جاتىر. ٶرت ورنىندا ٶرت-تەحنيكالىق زەرتحاناسىنىڭ ٶكٸلدەرٸ مەن پوليتسەيلەر جۇمىس ٸستەپ جاتىر. ٶرتتٸڭ شىعۋ سەبەبٸ انىقتالۋ ٷستٸندە. ٶرتتٸ سٶندٸرۋگە تٶتەنشە جاعدايلار دەپارتامەنتٸنٸڭ 97 قىزمەتكەرٸ مەن 25 تەحنيكا, جەرگٸلٸكتٸ اتقارۋشى ورگانداردىڭ ٷش قىزمەتكەرٸ مەن ٷش تەحنيكاسى جۇمىلدىرىلدى», - دەلٸنگەن حابارلامادا.
اقمولا وبلىسىنىڭ تٶتەنشە جاعدايلار دەپارتامەنتٸ ٶڭٸر تۇرعىندارى مەن قوناقتارىنا ٶرت قاۋٸپسٸزدٸگٸ ەرەجەلەرٸن ساقتاۋ قاجەتتٸگٸن ەسكەرتەدٸ. ٶرت بولعان جاعدايدا دەرەۋ 101 نٶمٸرٸنە قوڭىراۋ شالىڭىز.
