Almaty qalasynyń ákimi Baýyrjan Baibek «Sairan» men «Saiahat» avtobeketterin memlekettik menshikke qaitarý jumystary júrgizilip jatqanyn málim etti, dep habarlaidy QazAqparat.
«Almaty qalasynyń negizgi týristik qaqpasy sanalatyn - Almaty-1 jáne Almaty-2 stansylaryn qaitardyq. 2021 jylǵa qarai jolaýshylar áleýetin 4 esege arttyrý úshin temirjol stansylaryn qaita qurý josparlanyp otyr. Sondai-aq, biz «Sairan» men «Saiahat» avtobeketterin memlekettik menshikke qaitarý úshin qajetti jumystar júrgizip jatyrmyz. Bul qala mańyndaǵy qozǵalysty jaqsartýǵa jáne halyqaralyq tasymaldaýdy damytýǵa múmkindik beredi» dedi Baýyrjan Baibek «Busworld» kórmesiniń ashylýynda.
Budan buryn da habarlaǵanymyzdai, 1 shildeden bastap Almaty qalasyndaǵy temirjol beketteri qala menshigine ótedi.
