Almatylyq qutqarýshylar «Sý aidyndaryndaǵy qaýipsiz jaz» naýqanyn jalǵastyrýdy qamtamasyz etýde. Demalys kúnderi Aýǵanstan azamaty sýdan qutqaryldy, dep habarlaidy "Ult aqparat".
Tótenshe jaǵdai deparatamentiniń málimetinshe, karantinge qaramastan, ystyq kúni salqyn sýǵa shomylǵysy keletinder sany kúnnen-kúnge kóbeiip keledi. Almatylyq qutqarýshylar sýǵa shomylý erejeleriniń saqtalýy maqsatynda aldyn alý sharalary men reidter ótkizýde.
Senbi kúni TJ qyzmetkerleri Alataý aýdanyndaǵy iri sýpermarketterde «Qaýipsiz jaz!» naýqanyn uiymdastyrdy. Sýpermarket kassasynyń janynda kelýshilerge saýda jasaǵan túbirtekpen qosa, «Sý qoimalaryndaǵy qaýipsizdik erejeleri» týraly jadynamalar taratyldy.
Sonymen birge, qalanyń barlyq aýdandarynda tótenshe jaǵdai, politsiia, Ulttyq ulannyń patrýlderi jáne volonterler birlesip, demalýǵa ruqsat etilmegen jerlerde sýǵa shomylýdyń aldyn aldy. Jetisý aýdanyndaǵy Esentai ózeniniń boiynda jáne Kemel shaǵyn aýdanyndaǵy toǵandarǵa júrgizilgen reid barysynda sýǵa túsýge ruqsat etilmegen jerde eresekterdiń qaraýynsyz shomylyp júrgen jas balalar anyqtaldy. Olarmen profilaktikalyq áńgimeler ótkizilip, «Izgi niet» eriktileri «Sýda abai bolyńyzdar» atty eskertpelermen tanystyrdy.
Áýezov aýdanynda «109» Qutqarý qyzmetiniń qutqarýshylary motorly 2 qaiyqpen kezekshilikte boldy. Áýezov aýdany TJ bóliminiń qyzmetkerleri JPQB inspektorymen Sairan kóliniń batys jaǵalaýyn sholý kezinde 34 jáne 35 jastaǵy eki áiel ákimshilik jaýapkershilikke tartyldy. QR Ákimshilik quqyq buzýshylyq týraly kodeksiniń 364-baby 1-bóligine sáikes «Jalpy sýdy paidalaný erejelerin buzǵany úshin» ákimshilik hattama toltyryldy.
Jeksenbi kúni Almaly aýdanynda Sairan sý qoimasynyń shyǵys jaǵalaýyna demalýǵa kelgen 18 jastaǵy Dúisesh Marǵulan – jaǵadan 8 metr qashyqtyqta er adamnyń sýǵa batyp bara jatqanyn baiqap qalǵan.
«Tez arada kómekke umtylǵan Marǵulan ony jaǵaǵa súirep shyǵardy.Sýǵa batyp bara jatqan adamdy sý qoimasynda kezekshilikte bolǵan «109» qyzmetiniń qyzmetkeri Qozy Búrkitbaihan da baiqap, kómekke umtyldy. Jas jigit jaǵaǵa súirep shyǵarǵan adamǵa qutqarýshy tez arada alǵashqy kómek kórsetip úlgerdi. Zardap shegýshi Aýǵanstan Respýblikasynyń 1977 jyly týǵan azamaty Ahmadi Zaman Mýhammad №7 qalalyq klinikalyq aýrýhanasyna jetkizildi. Jaǵdaiy turaqty. Ómirine qaýip joq», - dep habarlady TJD-dan.
Osyǵan bailanysty, qutqarýshylar Almaty qalasynyń turǵyndary men qala qonaqtaryna eskertedi:
- «Shomylýǵa tyiym salynady» belgisi bar jerlerde ornatylǵan shekaradan asyp ketpeýdi;
- alkogoldi ishimdik iship jáne esirtkige eltigen kúiinde sýǵa shomylmaýdy;
- balalarǵa eresekterdiń qaraýynsyz sýǵa túspeýdi;
- sý qoimalaryn lastamaýǵa jáne qoqys tastamaýdy, kir jýmaýdy, janarmai quimaýdy, sýǵa shomylýǵa arnaiy ruqsat etilgen jerlerde jáne olarǵa jaqyn ornalasqan aýmaqtarda, onyń ishinde jaǵajaidan 500 metrge deiin qashyqtyqta kólikti jýmaýdy jáne jóndemeýdi.
