Bilim kúnine orai, Túrkistan oblysy, Sairam aýdanynda 5 jekemenshik mektep ashyldy. Onyń biri Qainarbulaq aýyldyq okrýgindegi 300 oryndyq bastaýysh synyptaryna arnalǵan mektep bolsa, qalǵan 1200 orynǵa arnalǵan 4 jalpy orta mektep Mankent aýyldyq okrýginde ornalasqan.
Aldymen aýdan ákimi U.Sádibekov, oblystyń Qurmetti azamattary Á.Dosbolov jáne S.Barahovalarmen birge Qainarbulaq aýylyndaǵy 300 oryndyq «Baqdáýlet» jekemenshik bastaýysh mektebiniń saltanatty ashylýyna qatysyp, lentasyn qidy. Jańa ǵimaratqa kelgen bastaýysh synyp ustazdary, oqýshylary men ata-analaryna jyly lebizderin bildirdi. Sonan soń, kópshilikke ǵimarattyń ishi tanystyryldy.
Ulasbek Sádibekuly óz quttyqtaýynda: «1 qyrkúiek – barsha halyqtyń, ásirese balalardyń kópten kútetin merekesi. Bul kún bárimizge jaqyn merekeniń biri degim keledi. Óitkeni, biz de sizder siiaqty mektep tabaldyryǵyn attap, qabyrǵasynda bilim alyp, eń qyzyqty jastyq shaǵymyzdy ótkizdik. Jańa oqý jylynyń alǵashqy kúni ustazdarymyzben qaýyshyp, oqýǵa erekshe daiyndalyp, taǵatsyzdana kútkenimiz áli de jadymyzda saqtaldy. Biyl aýdanymyzda 2022-2023 oqý jylyna birinshi synypqa 5847 bala mektep tabaldyryǵyn attaǵaly tur. Biz ári qarai da jas urpaqtarǵa qoldaý kórsetýdi jalǵastyratyn bolamyz. Balalardy mektepke tolyq qamtý úshin aýdanda investorlardy tarta otyryp, jekemenshik mektepterdi salý máselesi jaqsy qolǵa alynǵan. Osyndai qolaily jaǵdai jasalǵan, záýlim ǵimaratta jaqsy bilim alýǵa bar jaǵdai jasalǵan. Barshańyzdy búgingi Bilim kúnimen jáne jańa oqý jylynyń bastalýymen shyn júrekten quttyqtai otyryp, «Ustaz kóshten qalmasa, urpaq ozady» degen sózine sai, aldaǵy jumystaryńyzǵa shyǵarmashylyq tabys, joǵary jetistikter men densaýlyq, otbasylaryńyzǵa baq-bereke tileimin», – dedi.
Qurylysy 2021 jyly bastalyp, biyl aiaqtalǵan mektepke kásipker, aýdanǵa belgili azamat Saǵyndyqov Siqymbai óz esebinen 210 mln. teńge jumsaǵan. Jańa bilim uiasyna negizgi pánderdi oqytýǵa 20-dan asa muǵalim jumysqa qabyldanǵan.
Aýdan ákimi U.Sádibekov N.Sýlaimanovtyń jańa tiptik úlgidegi úsh tilde oqytylatyn 1200 oryndyq Ál-Farabi jalpy orta mektebin ashyp, Bilim kúnine arnalǵan merekelik is-sharaǵa qatysty.
Bul is-sharaǵa Shymkent qalalyq QHA tóraǵasynyń orynbasary, Qazaqstan ózbekteri etnomádeni birlestikter «Dostyq» qaýymdastyǵynyń tóraǵasy Ikramjan Hashimjanov, aýdan prokýrory D.Tlemisov, «AMANAT» Sairam aýdandyq partiia filialynyń Atqarýshy hatshysy A.Ábdiqadirov, mektepti qarjylandyrýǵa óz úlesterin qosqan «Bank Tsentrkredit» jáne «Qazaqstannyń Damý banki» AQ jergilikti filialynyń ókilderi qatysyp, mektep ujymy men balalardy jańa oqý jylynyń bastalýymen quttyqtady.
Osy kúni aýdan ákiminiń orynbasarlary N.Sýlaimanovtyń qoldaýymen qurylysy júrgizilgen mektepterdiń ashylý rásiminde boldy.
Jeke kásipkerdiń demeýimen jekemenshik mektepterdiń qurylystaryna 1 mlrd. 200 mln. teńgeden asa qarjy jumsalǵan. Búgingi tańda jekemenshik mektepterine 40 mln. teńge kóleminde mektep formasy, 80 mln. qarjyǵa oqýlyqtar satyp alǵan. 2022-2023 jyl aralyǵynda zamanaýi úlgidegi, tiptik, bilim standarttaryna sai, úsh tilde oqytylatyn 1200 oryndyq 6 mekteptiń qurylysyn aiaqtap tapsyrmaq. Jalpy 7200 balany oqýmen jáne 660 muǵalimdi jumyspen qamtý josparlanýda. Qazirgi tańda bala sany artqan mektepterden oqýshylar men ustazdar jekemenshik mektepterge ótýde. Olardyń saǵat júktemeleri men jumys oryndaryn saqtaý máseleleri boiynsha ákimdik, bólim, kásipodaq jáne kásipker arasynda memorandým túzilgen.
Biyl birneshe mektep boi kóterip, jańa oqý jylynda muǵalimder men balalardy qabyldaýda. Nátijesinde, osy eldi mekenderdegi mektepterdiń bir aýysymǵa ótý múmkindigi bar.
Jekemenshik mektepterdiń ashylýynyń ata-analar úshin utymdysy — balalarǵa sapaly bilim berýge mán berilgen, oqýlyqtar men mektep formalarymen qamtylǵan. Olardy tasymaldaý qyzmeti, tamaqtandyrý máseleleri uiymdastyrylǵan. Ásirese bala densaýlyǵyn jaqsartýǵa arnalǵan dárýmenderi bai, tabiǵi taza ónimderi as mázirine engizilgen. Ashyq jáne jabyq sport ǵimarattary jetkilikti. Keibir ǵimaratta bassein iske qosylǵan. Sondai-aq balalardy sergitetin, ónerge baýlý maqsatynda qosymsha úiirmeler ashylǵan.
Jalpy alǵanda, aýdanda 10 jekemenshik mekteptiń qurylysy qolǵa alynsa, sonyń 5-eýiniń qurylysy aiaqtalyp, merekeni kúni halyqtyń igiligine tapsyryldy.
