QR Kásipodaqtar federatsiiasy aldaǵy Parlament Májilisi men máslihattar depýtattarynyń sailaýyna baqylaýshy retinde 5700-ge jýyq adamdy belgiledi. Olar sailaýdyń ashyqtyǵy men ádil ótýin baqylaityn bolady, dep habarlaidy "Ult aqparat".
«Keshe ǵana QR Parlamenti Májilisi men máslihattar depýtattaryn sailaýdaǵy Qazaqstan Respýblikasy kásipodaqtar federatsiiasy baqylaýshylarynyń respýblikalyq shtabynyń birinshi otyrysyn ótkizdik. Biz sailaýǵa baqylaýshy retinde qatysamyz. Búgingi kúni 9500-den astam sailaý ýchaskelerine 5700-ge jýyq baqylaýshy óz kandidatýrasyn usyndy. Biz olarǵa pandemiia kezinde saqtyq sharalaryn túsindiremiz. Baqylaýshylar oqýdan jáne treningterden ótedi», - deidi Kásipodaqtar federatsiiasy tóraǵasynyń orynbasary Nurlan Óteshev Kásipodaqtar úiinde ótken brifingte.
Respýblikalyq shtabtyń múshesi, «Memlekettik, bank mekemeleri jáne halyqqa qyzmet kórsetý qyzmetkerleriniń qazaqstandyq kásipodaǵy» qoǵamdyq birlestigi tóraǵasynyń orynbasary Ataqozy Nurlanovtyń aitýynsha, basty maqsat – baqylaýshylardyń jumysyn ashyq jáne adal uiymdastyrý.
«Kásipodaqtar federatsiiasy QR Parlamenti Májilisi men máslihattar depýtattaryn sailaýdaǵy erkin protsesterge baqylaýshy retinde qatysýǵa daiyn ekenin málimdedi. Óńirlerde aimaqtyq baqylaýshylar shtaby quryldy, olarǵa aimaqtardan barlyq aqparat kelip túsedi. Bizdiń maqsatymyz – baqylaýshylardyń jumysyn ashyq, shynaiy túrde uiymdastyrý jáne sailaýdyń ashyqtyǵy men ádil ótýin qamtamasyz etý. Eń bastysy – adamnyń tańdaý múmkindigine qatysty konstitýtsiialyq quqyǵyn qamtamasyz etý. Meniń oiymsha, biz adaldyqty, ashyqtyqty, zańnama qaǵidattaryn saqtaýdy qamtamasyz ete alamyz», - deidi Ataqozy Nurlanov.
