QR Prezidenttigine kandidat Qasym-Jomart Toqaevtyń senimdi ókili, respýblikalyq qoǵamdyq shtabtyń basshysy Máýlen Áshimbaev sailaýaldy úgit-nasixattyń negizgi baǵyttary týraly aityp berdi, dep habarlaidy QazAqparat tilshisi.
Onyń aitýynsha, sailaýaldy úgit-nasixat kezinde jańa aqparattyq texnologiialardy qoldaný qajet. Sebebi biylǵy sailaýda áleýmettik jelilerdiń róli artyp otyr.
"Iá, osy jolǵy sailaý kezinde alǵash ret qoǵamdyq pikirdi qalyptastyrý men xalyqtyń oiyna áser etý jaǵynan áleýmettik jeliler úlken ról atqaratyn bolady. Osyǵan bailanysty respýblikalyq qoǵamdyq shtabtyń jumysy kezinde biz áleýmettik jelilerge basa nazar aýdaramyz. Osyny bólek bir baǵyt retinde shyǵaryp otyrmyz. Atalǵan jumysqa partiia qyzmetkerleri men mamandar atsalysady. Áleýmettik jelilerge basymdyq beretin bolamyz. Burynǵy sailaýlarda áleýmettik jeliler ondai ról oinamaǵan. Al osy joly jaǵdai múldem basqasha. Sondyqtan bul sailaýdyń úlken bir ereksheligi desek bolady", - dedi M.Áshimbaev jýrnalisterge bergen suxbatynda.
Shtab basshysynyń sózine qaraǵanda, áleýmettik jeliler arqyly úgit-nasixat sharalary zań boiynsha júrgiziledi. Oǵan eshkimdi mindettemeidi. Máselen, búginde shtabtyń janynan jastar qanaty quryldy. Oǵan kiretin jastardyń ishinde áleýmettik jelilerde belsendi ári oqyrmany kóp adamdar bar. Olardyń barlyǵy QR Prezidenttigine kandidat Qasym-Jomart Toqaevtyń senimdi ókili retinde ózderiniń jeke paraqshalarynda sailaýaldy úgit-nasixatty júrgize alady. "Kandidattyń senimdi ókilderi úgit-nasixat úshin aqsha almaidy. Al qosymsha bir platformalar nemese pablikter tartylsa, zań boiynsha aqy tóleý kerek", - dep atap kórsetti M.Áshimbaev.
Sondai-aq ol sailaýaldy úgit-nasixatqa sheteldik mamandardyń tartylmaitynyn málimdedi
«Qazirgi kezde qoǵamdyq shtabqa shetelden saiasi texnologiialar boiynsha mamandardy tartýǵa qatysty suraqtar bolyp jatyr. Osy másele boiynsha meniń aitatynym, bizdiń respýblikalyq qoǵamdyq shtabymyz shetelden arnaiy mamandardy tartqan joq. Qazaqstannyń ózinde mamandar bar. Áleýmettanýshylar, saiasi sala mamandary, jýrnalister - bári bilimdi mamandar. Sondyqtan biz shtabtyń jumysyna osyndai azamattardy tartyp jatyrmyz. Óitkeni qazirgi zamanda árbir máseleniń óziniń texnologiialary men tetikterin paidalaný kerek. Shetelden eshkimdi shaqyrǵan joqpyz. Ózimizdiń mamandarymyzdy tartyp, olarmen birge jumys jasap jatyrmyz», - dedi M.Áshimbaev jýrnalisterge bergen suxbatynda.
Onyń aitýynsha, QR Prezidenttigine kandidat Qasym-Jomart Toqaevtyń sailaýaldy baǵdarlamasy daiyn. Búginde atalǵan qujattyń keibir tustary pysyqtalyp jatyr.
«Biz kandidatymyzdyń sailaýaldy baǵdarlamasy boiynsha negizgi tezisterdi 11 mamyrda jariialaimyz. Oǵan deiin úgit-nasixat jumystaryn júrgizýge bolmaidy. Sol sebepti 11 mamyrda saǵat 18:00-den bastap úgit-nasixatty bastap, Qasym-Jomart Kemeluly Toqaevtyń sailaýaldy baǵdarlamasyn da tanystyratyn bolamyz», - dep atap kórsetti M.Áshimbaev.
Aita keteiik, elordada QR Prezidenttigine kandidat Qasym-Jomart Toqaevtyń respýblikalyq qoǵamdyq shtaby quryldy. Budan bólek, úgit-nasixat sharalary kezinde qalalyq, oblystyq jáne aýdandyq shtabtar jumys isteitin bolady. Búgin "Nur Otan" partiiasy Tóraǵasynyń orynbasary Máýlen Áshimbaev respýblikalyq shtabqa kimderdiń kirgenin aityp berdi.
