Ortalyq sailaý komissiiasy tóraǵasynyń orynbasary Konstantin Petrov sailaý kezinde nelikten beinetransliatsiia júrgizýge tyiym salynatynyn túsindirdi, dep habarlaidy QazAqparat.
«Transliatsiiaǵa salynatyn tyiymǵa qatysty aitar bolsaq, bul másele qazirgi ýaqytta áleýmettik jelide qyzý talqylanyp jatyr. Shyntýaitynda, biz transliatsiiaǵa shekteý qoiatyn eshqandai qaýly shyǵarǵan joqpyz. Sailaý ýchaskesinen transliatsiiany júrgizýge BAQ quqyly. Buryn solai bolǵan, búgin de solai bolyp qala bermek. Biz jaǵdaidyń mán-jaiyn túsindirsek deimiz. Qazirgi zańnama talaptaryna sáikes, kedergisiz túsirýge bolady. Iaǵni ulttyq baiqaýshylar kedergisiz túsirilim júrgizedi, tek eki shekteý bar – daýys berýdiń qupiialylyǵy men jeke málimetter saqtalýy tiis. Qalǵan eshqandai shekteý joq», - dedi Konstantin Petrov Ortalyq sailaý komissiiasynyń otyrysynan keiin ótken baspasóz máslihatynda.
Ol sonymen qatar túsirilgen videony baiqaýshylardyń taratý máselesine qatysty pikir bildirdi.
«Kontentti taratý jónindegi baiqaýshylardyń quzyretine keler bolsaq, ol zańda qarastyrylmaǵan. Biz baiqaýshylardyń sailaý ýchaskesinde videotransliatsiia júrgizýine árdaiym qarsy shyǵyp keldik. Ortalyq sailaý komissiiasynyń bul baǵyttaǵy pozitsiiasy esh ózgergen joq», - dedi Konstantin Petrov.
