EQYU baiqaýshylary missiiasynyń jetekshisi Iaroslav Domanski Qazaqstandaǵy Májilis pen máslihat depýtattaryn sailaý barysynda qandai jaittarǵa erekshe nazar aýdarylatynyn aityp berdi, dep habarlaidy QazAqparat.
«Sailaý nebári bir kúnniń ishinde óte shyǵatyn is-shara emes. Óitkeni, sailaýǵa deiin jáne sailaýdan keiin de oryn alatyn protsester bar. Olar sailaý protsesiniń barynsha mańyzdy bóligi sanalady. Mine, osyǵan orai biz missiiamyzdyń aiasynda atalǵan protsesterdiń barlyǵyn qamtityn bolamyz. Bul missiia Qazaqstandaǵy sailaýlardy baiqaý jónindegi 11-shi shekteýli missiia sanalady», - dedi ol elordada ótken baspasóz máslihatynda.
Onyń atap ótýinshe, EQYU Demokratiialyq institýttar jáne adam quqyqtary biýrosynyń alǵashqy missiiasy - 1999 jyly, al sońǵy missiiasy 2019 jyldyń maýsymynda baiqaýshy retinde qatysty.
«Ótken jyly múddeli taraptarmen óte jaqsy yntymaqtastyqqa kýá boldyq. Biyl da osy sailaý naýqany barysynda dál sondai yntymaqtastyqtyń jalǵasýyn taǵatsyzdan kútemiz. Alǵashqy kezdesý osy baspasóz máslihaty aiaqtalǵannan keiin QR Ishki ister ministrligimen ótedi. Odan keiin Ortalyq sailaý komissiiasynda kezdesý bolady», - dedi Iaroslav Domanski.
Sonymen qatar ol Qazaqstandaǵy depýtattar sailaýy kezinde EQYU baiqaýshylary missiiasynyń quramynda qandai sarapshylar bolatyndyǵyn aityp berdi.
«Bul missiia tek qysqamerzimdi baiqaýshylardan ǵana jasaqtalmaidy. Negizinen uzaqmerzimdi baiqaýshylar jumys isteidi jáne sailaýǵa qatysty sarapshylardyń negizgi komandasy osydan eki kún buryn Nur-Sultan qalasyna keldi. Onyń quramynda 10 qatysýshy elden 11 sarapshy bar. Olardyń barlyǵy quqyqtyq, sailaý, saiasi jáne BAQ-qa qatysty máseleler boiynsha sarapshylar sanalady», - dedi ol.
EQYU missiiasynyń jetekshisi baiqaýshylar sailaý protsesiniń barlyq mańyzdy elementterin saralaitynyn basa aitty.
«Dúisenbi kúni bizge 10 qatysýshy elden 24 uzaqmerzimdi baiqaýshy kelip qosylady. Nur-Sultan qalasynda brifing ótkizgennen keiin olar búkil el aýmaǵyna bólinedi. Bul sailaý naýqanynda oryn alatyn jaittyń barlyǵyn qamtý úshin jasalyp otyr jáne olar sailaý ótken kúnnen keiin de osynda qalady. Sailaý biýronyń barlyq ádistemelerine sai ótedi dep úmittenemiz. Bul sailaýdyń BUU mindettemelerine, demokratiialyq sailaýlarmen bailanysty standarttarǵa, sonymen qatar Qazaqstannyń ulttyq zańnamasyna sáikes keletindigine baqylaý jasai alamyz dep oilaimyz», - dedi Iaroslav Domanski.
