Foto: © Sputnik / Abzal Kaliev
Májilis tóraǵasy Erlan Qoshanov Memleket basshysy Qasym-Jomart Toqaevtyń Reseige jasaǵan jumys saparyna qatysty pikir bildirdi, dep habarlaidy "Ult aqparat" Azattyq Ruhy saityna silteme jasap.
«Men muny durys sapar dep esepteimin. Sebebi Uly Otan soǵysy men Uly jeńis – bizdiń ortaq tarihymyz. Sondyqtan barlyq baýyrlas memleketterdiń basshylary sol paradta boldy. Muny soǵysta sheiit bolǵan ata-babalarymyz, áke-atalarymyz arnalǵan qurmet dep oilaimyn. Bul máseleni saiasilandyrýdyń qajeti joq dep esepteimin», - dedi Qoshanov.
Májilis spikeri atap ótkendei, Qazaqstannan 1,2 mln-ǵa jýyq adam soǵysqa qatysqan.
«Onyń jartysy soǵystan oralmady. Olardyń kóbi Reseide jatyr. Olardyń izdeýshisi, joqtaýshysy bolýy kerek pe, bolmaýy kerek pe? Meniń oiymsha, ol izdeýshi, ol joqtaýshy – qazaq halqy, Prezident bolýy kerek. Prezidenttiń saparyna zerdelep qarasańyz, ol aldymen Astanadaǵy Otan qorǵaýshylar memorialyna baryp, gúl shoǵyn qoiyp, erlikpen kóz jumǵandarǵa taǵzym etti. Sonymen birge ardagerlerimizge Halyq qaharmany ataǵyn berdi.
Sodan keiin Rjev qalasyna bardy. Onda 22 myń qazaqstandyq azamat soǵysta qaza bolǵan. Olardyń báriniń aty-jóni tasqa qashalyp jazylǵan. Solardyń bárine ziiarat jasaý úshin Prezident sol jerge bardy. Ózimizdiń dástúrimiz boiynsha Quran da oqytty. Joqtaýshysy bolyp bardy», - dedi Qoshanov.
Májilis tóraǵasy ol jerde Prezidenttiń ákesiniń týǵan aǵasy Qasym Boltaev ta jerlengenin aitty.
«Sondyqtan bul saparda Prezident óziniń azamattyq boryshyn, perzenttik boryshyn jáne prezidenttik boryshyn atqaryp keldi dep esepteimin», - dedi Erlan Qoshanov Májilis kýlýarynda jýrnalister suraǵyna jaýap berip.
