Parlament Senatynyń Tóraǵasy Máýlen Áshimbaev Túrkistan oblysynda jergilikti turǵyndarmen kezdesti. Kezdesý barysynda konstitýtsiialyq reformanyń máni men mańyzy keńinen sóz boldy, dep habarlaidy "Ult aqparat" Parlament Senatynyń baspasóz qyzmetine silteme jasap.
Senat Spikeriniń sapary Qoja Ahmet Iasaýi kesenesine ziiarat etýmen bastaldy. Ol jerde senatorlar saiasi qýǵyn-súrgin jáne asharshylyq qurbandarynyń rýhyna taǵzym etip, duǵa jasady.
Óńirdiń ziialy qaýymymen kezdesýde Memleket basshysynyń bastamasymen elimizde júrgizilip jatqan saiasi reformalar talqylandy. Sondai-aq jiynǵa qatysýshylar tarihi sanany jańǵyrtý máselesine nazar aýdardy. Senat Tóraǵasy bul rette sońǵy jyldarda belsendi júrgizilip kele jatqan asharshylyq taqyrybyn zertteý jumystarynyń mańyzdy ekenin, osy bastamany respýblikalyq jáne óńirlik deńgeide jalǵastyrý kerektigin aitty.
«Asharshylyq taqyrybyna arnalǵan jumystardy ári qarai jalǵastyrýdyń mańyzy zor. Bul, birinshi kezekte, tarihi sanamyzdy jańǵyrtý úshin qajet. Al, tarihi sanany jańǵyrtý degenimiz, Táýelsizdikti nyǵaitý, eldikti eńseli etý jáne ulttyq qundylyqtardy dáripteý jolyndaǵy negizgi qadamdardyń biri», – dedi Máýlen Áshimbaev.
Sonymen qatar Senat Spikeri el Prezidentiniń bastamasymen qolǵa alynǵan saiasi reformalarǵa toqtaldy. Ol Konstitýtsiiaǵa engizý úshin usynylǵan túzetýler men aldaǵy referendým elimizdiń saiasi júiesin ǵana emes, basqa da salalardy damytýǵa berik negiz qalaitynyn atap ótti.
«Konstitýiialyq reforma bilik monopoliiasyn boldyrmaýǵa jáne saiasi básekeni damytýǵa jol ashady. Bul bastamalardyń bári Qazaqstandy demokratiialyq, quqyqtyq, ádiletti jáne áleýmettik memleket retinde nyǵaitýǵa baǵyttalǵan. Osy joldaǵy jumystar Konstitýtsiiaǵa ózgerister engizýmen toqtamaityny belgili. Aldaǵy ýaqytta da saiasi júiemizdi reformalaý isi jalǵasa beredi», – dedi Senat Tóraǵasy.
Sonymen qatar Máýlen Áshimbaev Ahmet Iasaýi atyndaǵy Halyqaralyq qazaq-túrik ýniversitetiniń oqytýshy-professorlar quramymen jáne stýdentterimen kezdesti. Ol is-sharada konstitýtsiialyq reformanyń negizgi baǵyttary týraly aityp, jastardyń suraqtaryna jaýap berdi.
«Qazirgi tańda bilim alý ómirlik protseske ainaldy. Búginde jai ǵana saýatty bolý jetkiliksiz. Ýniversitet qabyrǵasynda bakalavr nemese magistr dárejesin ielendim dep te toqmeiilsýge bolmaidy. Árdaiym izdeniste bolý qajet. Ózińdi úzdiksiz jetildirip otyrý – jetistiktiń negizi», – dedi Palata Spikeri.
Sondai-aq Senat Tóraǵasy Kentaý transformator zaýytynyń ujymymen jáne óńirdegi bir top áleýmettik kásipkermen kezdesip, saiasi reformalardyń mańyzyna nazar aýdardy. Kezdesýde aimaqtaǵy ózekti máseleler, atalǵan salaǵa qatysty túitkilder de jan-jaqty talqylandy. Máýlen Áshimbaev aitylǵan pikirler men usynystar tiisti memlekettik organdar tarapynan pysyqtalyp, Parlamenttiń zań shyǵarý jumysynda eskeriletinin jetkizdi.
