Saiasi partiialardy qurý men tirkeý talaby edáýir jeńildeidi. Bul týraly búgin QR Parlamenti Senatynyń tóraǵasy Máýlen Áshimbaev aitty, dep habarlaidy "Ult aqparat".
«Prezidentimizdiń usynysymen búgin qabyldanyp otyrǵan zańdar eldiń saiasi ómirinde erekshe mánge ie. Saiasi partiialardy qurý men tirkeý talaby edáýir jeńildetilip otyr. Partiialardy tirkeýdiń talaptyq shegi tómendetildi. Qabyldanǵan zańdar kóppartiialyq júieni odan ári nyǵaitýǵa septigin tigizetini sózsiz», - dedi M. Áshimbaev Senattyń jalpy otyrysynda
Munymen qosa ol áielder men jastarǵa elimizdiń qoǵamdyq-saiasi ómirine belsene qatysýy úshin qosymsha múmkindik beriletinin atap ótti.
«Sondai-aq partiialardyń sailaý tiziminde áielder men jastar úshin 30 paiyzdyń mindetti kvota belgilendi. Ol áiel adamdardyń jáne jastarǵa elimizdiń qoǵamdyq-saiasi ómirine belsene qatysýy úshin qosymsha múmkindik beredi. Mundai ózgertýlerdi demokratiialyq damý jolyndaǵy naqty qadam dep qarastyrýymyz kerek. Olar saiasi júiemizdi ary qarai damytýǵa úles qosady dep senemiz», - dedi Senat tóraǵasy.
Budan buryn habarlanǵandai, Senattyń jalpy otyrysynda «Qazaqstan Respýblikasyndaǵy sailaý týraly» Konstitýtsiialyq zańyna tolyqtyrýlar engizý týraly» Konstitýtsiialyq zańy men «Saiasi partiialar týraly» Zańyna ózgeris pen tolyqtyrýlar engizý týraly» Zańy qabyldandy.
