Saiasi qýǵyn-súrgin jáne aqtaý protsesine qatysty ǵylymi baǵdarlama ázirlendi. Bul týraly QR Premer-Ministriniń orynbasary Eraly Toǵjanov aitty, dep habarlaidy "Ult aqparat".
«Keshe memlekettik komissiianyń 2-otyrysy ótti. Kún tártibinde júrgen biraz másele talqylandy. Onyń ishinde aimaqtaǵy komissiialardyń jumysyna qatysty máseleler pysyqtaldy. Memlekettik komissiia qyzmetin qamtamasyz etý maqsatynda «Qazaqstanda 20-ǵasyrdyń 20-50 jyldaryndaǵy jappai saiasi qýǵyn-súrgin jáne aqtaý protsesi» biryńǵai derekter bazasyn qalyptastyrý taqyrybynda arnaiy ǵylymi baǵdarlama ázirlendi. Ol baǵdarlama daiyn. Qarjy máselesi tolyqtai sheshildi. Komissiianyń búkil jumysy, zertteýshilerimizdiń bári osy ǵylymi baǵdarlama negizinde ary qarai jumys isteidi. Baǵdarlamany kelesi aptada joǵary ǵylymi-tehnikalyq keńestiń otyrysynda da qarastyratyn bolamyz. Keńes qorytyndysy boiynsha baǵdarlamaǵa qatysty kún tártibindegi máseleler bolsa, onda qosymsha qabyldaimyz», - dedi Eraly Toǵjanov Ortalyq kommýnikatsiialar qyzmetindegi baspasóz máslihatynda.
Onyń atap ótýinshe, memlekettik komissiianyń jumys baǵyttary boiynsha 11 jumys toby quryldy. Bul toptardyń jumysyna elimizdegi jetekshi ǵylymi-zertteý institýttarynyń, JOO-lardyń 57 ǵylymi qyzmetkeri jumyldyryldy.
«Barlyq memlekettik organdarmen komissiianyń jumys toptarynyń birlesken jumysyn qamtamasyz etý maqsatynda arnaýly jobalyq keńse qurylyp, qyzmetin bastap ketti. Keńse quramynda 11 memlekettik organnyń ókilderi, 6 ǵalym bar. Olar jumysyn istep jatyr. Barlyq óńirde ákimderdiń orynbasarlary basqaratyn arnaýly óńirlik komissiialar quryldy. Olardyń da quramyna jergilikti ǵalymdar, qoǵam ókilderi, máslihat depýtattary kiredi. Jergilik komissiialar aimaqtyq muraǵattarǵa qatysty jumystardy atqarady», - dedi Úkimet basshysynyń orynbasary.
