QR Parlamenti Májilisiniń depýtaty Berik Ábdiǵaliuly saiasi qýǵyn-súrgin jáne asharshylyq qurbandarynyń tolyq tizimin jasaý jumystaryna qatysty usynys aitty, dep habarlaidy "Ult aqparat".
«Mamandar tolyq tizimin jasaý múmkin emestigin alǵa tartyp otyr. Qazaq halqynyń shejiresi bar. Árkim óz shejiresinde ótken ǵasyrdyń 20-30 jyldardaǵy derekterdi qamtý kerek. Búkil qazaq el bolyp jasamasaq, ony jalǵyz memlekettik komissiia sheshe almaidy. Mysaly, Ýkrainanyń ózinde úi-úidi aralaý júrgizildi, olar qujattardy birshama retke keltirdi» - dedi Ábdiǵaliuly Ortalyq kommýnikatsiialar qyzmetinde.
Onyń aitýynsha, memlekettik komissiia jumysymen qatar, halyq ta óz usynystary men estelikterin jetkizip, kómek kórsetýi kerek.
«Buǵan barshamyz birdei atsalyspasaq, ulttyq joba retinde úles qospasaq, olardyń tizimin jasaý múmkin bolmaidy. Sondyqtan ár azamat óziniń shejiresin qarap, túgendep shyqsa, ol da bir úlken nátije bolar edi. Árine, biz óz tarapymyzdan qujattardy qaraimyz, biraq árbir otbasynyń tizimin ashý qiynǵa túsedi», - dedi depýtat.
