Repressiia jyldarynda Keńes Odaǵynda ómir súrip jatqan barlyq etnos ókilderi zardap shekti. Bul týraly Prezident Ákimshiligi Basshysynyń birinshi orynbasary Dáýren Abaev aitty, dep habarlaidy QazAqparat.
«31 mamyrda 100 myńǵa jýyq saiasi qýǵyn-súrgin qurbandaryn eske alamyz. Qaiǵyly oqiǵany umytpaý - bizdiń azamattyq paryzymyz. 1920-1930 jyldardaǵy jappai qýǵyn-súrgin, asharshylyq aýyr azap boldy jáne adamdyqqa jatpaityn áleýmettik eksperiment nátijesinde 3 millionnan astam otandasymyz qaza taýyp, jer aýdaryldy.
Bul oqiǵa halqymyzdyń janyna jara saldy. Sol úshin Elbasy - Nursultan Nazarbaev egemendigimizdiń alǵashy jyldarynan saiasi-qýǵyn súrgin qurbandaryn este saqtap, rýhyna taǵzym etýge zor mán bergen. Memleket basshysy Qasym-Jomart Toqaev osy ustanymdy jalǵastyryp keledi», - dedi Dáýren Abaev «Qazaqstan: tarihi taǵylym saiasaty» atty halyqaralyq online-konferentsiiasynda.
Onyń aitýynsha, 31 mamyr - solaqai saiasat zardabynan sabaq alýymyz qajettigin taǵy bir eske salatyn kún.
«Bul qoldan jasalǵan tragediia qazaq halqyna orny tolmas qasiret alyp keldi. Tiri qalǵandardyń janyna jazylmas jara saldy. Repressiia jyldary bizdiń el ádiletsiz jaza qoldanatyn túzetý lagerine ainaldy. Sol jyldary jeke tulǵalardyń oilaýsyz áreketterinen Keńes Odaǵynda ómir súrip jatqan barlyq etnos zardap shekti. Birlik, shydamdylyq jáne danalyqtyń, bir-birin qoldai bilýdiń arqasynda qatań synaqtyń bárinen óttik. Búgingi tańda bul qasietter HHI ǵasyrdaǵy bizdiń ulttyń negizgi jetistiginiń negizi bolyp sanalady», - deidi ol.
«Tarihtan taǵylym – ótkenge taǵzym» jobasynyń maqsaty – jalpyulttyq tarihi sanany qalyptastyrý, «Rýhani jańǵyrý» baǵdarlamasynyń qundylyqtar qaǵidatynda qazaqstandyq biregeilik pen birlikti nyǵaitý.
Aita ketsek, «Tarihtan taǵylym – ótkenge taǵzym» halyqaralyq jobasynyń is-sharalary tuńǵysh ret 2010 jyly TMD-ǵa múshe memleketterdiń Gýmanitarlyq yntymaqtastyǵynyń memleketaralyq qorynyń qoldaýymen Astana qalasynda jáne «ALJIR» mýzei-memorialdyq kesheninde uiymdastyryldy. Is-shara aiasynda QR Prezidenti jer aýdarylǵan jáne qýǵyn-súrginge ushyraǵandardyń 12 memleketten kelgen urpaqtaryn qabyldap, olar japa shekken halyqty este saqtaý máseleleri talqylaǵan. Is-shara barysynda TMD elderi tarihshylarynyń «Tarihtan – qazirgi zamanǵa» atty birinshi forýmy ótti, oǵan 300-den astam otandyq jáne sheteldik tarihshylardyń ǵalymdary qatysty. Forým qorytyndysy boiynsha tarihi murany zerdeleýdiń biryńǵai tásilderin ázirleý jónindegi Astana hartiiasy qabyldandy.
