«Habar» respýblikalyq telearnasyndaǵy «Jeti kún» aptalyq-saraptamalyq baǵdarlamasynda saiasattanýshylar men mádeniet qairatkerleri Memleket basshysy Qasym-Jomart Toqaevtyń suhbatyna orai pikir bildirdi, dep habarlaidy QazAqparat.
Aita keteiik, Prezident osy aptada «Qazaqstan» telearnasyndaǵy suhbatta birqatar mańyzdy máselege qatysty naqty jaýap berip, qańtar oqiǵasynan keiin elimizde qalyptasqan jaǵdaiǵa keńinen toqtalyp ótken bolatyn.
Bul turǵyda Qoldanbaly etnosaiasi zertteýler institýtynyń direktory Talǵat Qaliev Qazaqstan shekarasyn buzý múmkin emes degen oiyn aitty. «Óitkeni barlyq kórshiles eldermen bizdiń shekaramyz halyqaralyq deńgeide bekitilgen. Osy oraida elimizdiń tutastyǵy máńgi bolady dep oilaiyn», - dedi ol.
Óz kezeginde Senat depýtat Dana Nurjigit Prezident Qasym-Jomart Toqaevtyń aityp jatqan reformalary jái ǵana sóz emes ekenin, naqty mindetterdi iske asyrýǵa baǵyttalǵanyn jetkizdi.
«Reforma degenimiz – júie qurý. Bul turǵyda «kim ne úshin jaýap beredi», «kim kimnen keiin nege jaýap berýi kerek», iaǵni árqaisymyzdyń áreketimiz – fýnktsiiamyz anyqtalýy kerek. Óitkeni barlyǵy aralasyp ketken», - dedi senator.
Al Qazaqstannyń eńbek sińirgen qairatkeri Jeńis Seidollauly óner adamdary, mádeniet qairatkerleri Jańa Qazaqstandy qurýǵa atsalysýy kerek ekenin aitty. «Sonda ǵana birligimiz bekemdelip, elimiz kórkeie túsedi. Bul bizdiń óskeleń urpaq aldyndaǵy mindemiz dep oilaimyn», - dedi ánshi.
Sonymen qatar, Qazaqstannyń halyq ártisi Tilektes Meiramov Prezident halyqty eńbekqorlyqqa baýlýǵa erekshe ekpin qoiǵanyn atap ótti. Bul turǵyda eńbekqorlyq qasietin qanymyzǵa sińirip, masyldyq psihologiiadan arylý baǵytynda tiisti jumystardy atqarý mańyzdy.
Aita keteiik, biyl 8 aqpanda QR Prezidenti Úkimet otyrysynda shetelge zańsyz shyǵarylǵan qarjyny qaitarý jóninde tapsyrma bergen edi.
Osyǵan bailanysty saiasattanýshy Qazbek Maigeldinov sońǵy málimetter boiynsha 40-tan astam memlekette Qazaqstannyń aqshasy jatqanyn, bul qarajat túrli sektorda ártaraptandyrylǵanyn aitty.
«Bul rette basqa memleket ekenin, bóten eldiń zańy, basqa eldiń qarjy saiasaty bar ekenin eskerý kerek. Ol jaqtan aqshany shyǵaryp alý úshin áýeli naqty tulǵalardy, naqty mekenin anyqtap alý qajet», - dedi Maigeldinov.
Munymen qosa saiasattanýshy Aidar Ámirebaev qazir elimizde «Halyq únine qulaq asatyn memleket» ustanymyna ekpin qoiylyp otyrǵanyn eske saldy.
«Halyqty estitin memleket birinshi kezekte basshydan bastalýy kerek dep oilaimyn. Sondyqtan telearnada bolǵan suhbatta Memleket basshysy bul jaǵdaidy tiianaqty kórsetkenin baiqadyq», - dedi Ámirebaev.
