Bul týraly QR Prezidenti janyndaǵy QSZI aǵa ǵylymi qyzmetkeri Sliamjar Ahmetjarov málimdedi, dep habarlaidy Baq.kz agenttigi.
Ol Memleket basshysy Qazaqstan halqy Assambleiasynyń sessiiasynda Konstitýtsiiaǵa ózgerister men tolyqtyrýlar engizý máselesi boiynsha respýblikalyq referendým ótkizýdi usynǵanyna qatysty pikir bildirdi.
"Qazirgi ýaqyttaǵy Konstitýtsiianyń jańa jobasy 33 bap boiynsha (bul Konstitýtsiianyń úshten biri) ózgerister men tolyqtyrýlar engizýdi qarastyrady. Bul turǵyda, árine, eldiń Ata zańyn túrlendirý men apgreid jasaý kópshiliktiń qatysýyn qajet etedi. Azamattardyń mańyzdy memlekettik máseleler boiynsha sheshim qabyldaýǵa qatysýynyń tiimdi tásilderiniń biri referendým ótkizý bolyp sanalady. Bir aita keterligi, «Respýblikalyq referendým týraly» zańǵa sáikes referendým taǵaiyndaý týraly bastamany Prezident, Parlament, Úkimet nemese sany 200 myń adamnan kem emes Qazaqstan azamattary kótere alady", - dep atap ótti sarapshy.
Osylaisha, Memleket basshysy aldaǵy konstitýtsiialyq ózgeristerdi qoǵamdyq talqylaýdyń mańyzdylyǵyn eskerip, referendým ótkizý jóninde bastama jasaý quqyǵyn paidalandy deidi.
"Konstitýtsiialyq reforma máselesi boiynsha respýblikalyq referendým ótkizýdiń birqatar oń tustary bar. Birinshiden, bul ishki jáne halyqaralyq aýditoriianyń Jańa Qazaqstanda memlekettik ómirdiń mańyzdy máseleleri boiynsha sheshimder qoǵamnyń keń aýqymdy qatysýy men qoldaýy negizinde ǵana qabyldanatyndyǵyn kórsetý. Ekinshiden, halyqty referendýmda daýys berý protsesine tartý onyń azamattyq belsendiligi men saiasi qatysýyn arttyrýǵa yqpal etetin bolady. Sonymen, aldaǵy konstitýtsiialyq ózgerister boiynsha referendým ótkizý Qazaqstan azamattaryna memlekettik mańyzy bar máseleler boiynsha erik bildirý quqyǵyn paidalanýǵa múmkindik beredi. Keń maǵynada konstitýtsiialyq túzetýler úshin tikelei daýys berý – azamattardyń Jańa Qazaqstannyń qurylysyna tikelei qatysýyna jaǵdai jasaidy", - dedi Sliamjar Ahmetjarov.
