BTS Digital bilim jobalarynyń jetekshisi Saiasat Nurbek óskeleń urpaqqa, jastarǵa kerek bes daǵdyny atady, dep habarlaidy QazAqparat.
«Birinshiden, óskeleń urpaqqa tsifrlyq saýat kerek. Sebebi biz tolyqqandy tsifrlyq dáýir kóshine bet burdyq. Tsifrlyq qoǵamda zamannyń igiligin meńgermegen ata-analardyń, balalardyń qinalyp jatqany ótirik emes. Ókinishke qarai, tsifrlyq-aqparattyq saýat Qazaqstanda jetkilikti deńgeide dep aita almaimyz. 2018 jylǵy Halyqaralyq aqparattyq jáne kompiýterlik zertteýdiń nátijesi boiynsha biz tómen pozitsiiadan kórindik», - dedi Saiasat Nurbek Bilim jáne ǵylym ministrligi uiymdastyrǵan «Bolashaqtyń quzyretteri. 21 ǵasyrdaǵy daǵdy men iskerlik. Ony qalai damytý kerek?» atty onlain-vebinarda.
Onyń aitýynsha, jastarda standarttan tys, kreativti oilaý qabileti bolýy tiis.
«Nege deseńiz, dástúrli salalardyń ózinde standarttar buryn sońdy bolmaǵan ózgeristerge ushyrap jatyr. Buryn adam bir standart nemese bilim negizinde kóp jyl boiy jumys istei berse, qazir ár 5-7 jyl saiyn mamandyǵyńyz tolyǵymen ózgerip ketýi múmkin. Sondyqtan siz jańa jaǵdailarǵa jańa bilimmen jáne ustanymmen tez beiimdelýińiz kerek. Úshinshiden, emotsiialyq intellekt bolýy tiis. Nege deseńiz, jeke batyrlardyń ómiri ótti. Qazir kez kelgen salada negizgi jumys úlken ujymdyq, toptyq negizde atqarylady», - deidi ol.
Saiasat Nurbek jan-jaqty kommýnikatsiiany ornata bilý qabiletin – tórtinshi daǵdyǵa jatqyzdy.
«Biz qazir bir-birimizdi betpe-bet kórip otyratyn jaǵdaida bolmai qaldyq. Ustazdar bolsyn, balalar bolsyn, qazir qatty sharshap júr. Negizinde álemdik ýniversitetter bul úrdisti zertteý ústinde. Biz sapasyz bailanysta otyrmyz. Onlain rejimde tipti bir-birimizdi durys esti de almaýymyz múmkin. Sondyqtan miymyzǵa aqparatty tolyqqandy qabyldaý qiynǵa túsip jatyr. Besinshiden, qazir bilim nemese jumys salasy bolsyn, adamnyń belsendiligin talap etedi. Iaǵni bala ózin-ózi basqaryp, tártip ornata bilýi kerek», - dedi ol.
