Ulttyq qoǵamdyq senim keńesiniń alǵashqy otyrysynda sóz alǵan saiasattanýshy Saiasat Nurbek elde tiimsiz jumyspen qamtý beleń alǵanyn aitty, dep habarlaidy "Ult aqparat".
«Bizdegi Bilim jáne ǵylym ministriligi men Eńbek jáne halyqty áleýmettik qorǵaý ministrligi adam kapitalyn birlesip damyta almai otyr. Birinshi másele – bilimge degen jappai suranys joq. Jalpy ishki ónimniń túsip ketkenine qaramastan, bizde tiimsiz jumys oryndary saqtalýda. Bilim berý júiesi bilim ekonomikasynyń mamandaryn áli kúnge daiyndamai otyr. Joǵary bilimniń buqaralyq sipat alyp ketkenin Qasym-Jomart Kemeluly óziniń Joldaýynda da kóterdi. Joǵary bilimniń bul máselesine endi ǵana júieli qarap jatyrmyz. Sóite tura, bilim berý júiesi bizneske qulaq aspaidy. Jumys berýshilerdiń 91 paiyzy túlekterdiń praktikalyq bilimi men mashyǵy joq ekenin aitýda. Diplom ieleriniń jartysyna jýyǵy óz mamandyǵy boiynsha jumys istemeidi. 25 jastan keiin bizdiń adamdar bilim alýdy toqtatady. Biliktiligin arttyrýǵa zer salmaidy. «Eńbek kedeiligi» degen túsinik qalyptasty. Mysaly, bizde dáriger men kólik júrgizýshisiniń ailyqtaryndaǵy aiyrmashylyq 20 paiyzdan aspaidy. Al AQSh-ta bul kórsetkish - 260 paiyz, Germaniiada 174 paiyz, Braziliiada 172 paiyz. Osylaisha, neǵurlym joǵary bilikti, shyǵyny eleýli mamandyqtarǵa suranys baiqalmai otyr. Bul - óte kúrdeli problema», - dedi Saiasat Nurbek.
