QR Parlamenti Májilisiniń depýtaty Saýytbek Abdraxmanov qazaq tilindegi saittarda rýlyq alaýyzdyqty týǵyzatyn máselelerge alańdaidy, dep xabarlaidy Ult.kz tilshisi QazAqparat agenttigine silteme jasap.
"Ókinishke qarai, qazirgi kezde saiasi ekstremizm, ulttyq pen rýlyq alaýyzdyqty týǵyzatyn jaǵdailar az emes. Máselen, qazaq tilindegi saittardyń birqatarynda ulttyń birligine qaýip tóndiretin, jekelegen óńirlerge, jekelegen taipalarǵa, jekelegen rýlarǵa til tigizetin, kúlkige ainaldyratyn máseleler dendep bara jatyr. Osy máselege basa nazar aýdarǵym keledi. Bul jaqsylyqtyń basy emes", - dedi tanymal jýrnalist Abdraxmanov búgin Óńirlik BAQ forýmynda.
Onyń aitýynsha, búginde óńirlik buqaralyq aqparat quraldary ult pen xalyq birligi máselesine erekshe kóńil bólýi kerek.
Aita keteiik, búgin Astanadaǵy "Qazmedia" ortalyǵynda Óńirlik BAQ forýmy ashyldy. Sol jerde ministr Dáýren Abaev Óńirlik BAQ aliansynyń nemen ainalysatynyn aityp berdi.
